सुपर टाइफुन क्राथन हङकङ नजिक, यस्तो छ खतराको सम्भावना

सुपर टाइफुन क्राथन यतिखेर हङकङको नजिक छ। अब्जर्भेटरीले सोमबार दिउँसो बताएअनुसार क्राथन सहरको ८ सय किलोमिटरभित्र प्रवेश गरेको थियो।

त्यस्तै, अब्जर्भेटरीको साँझ ७ बजेको अद्यावधिक बुलेटिनमा यसले बुधबार लुजोन क्षेत्र पार गरेर दक्षिण चीन सागरको उत्तरपूर्वी भागमा प्रवेश गर्ने र ताइवानको दक्षिणी भागमा पुग्ने अनुमान गरिएको छ। यसपछि हङकङबाट ५ सय किलोमिटरको दूरी कायम गर्दै ताइवान सर्नेछ।

‘यसको हङकङमा प्रत्यक्ष खतराको सम्भावना छैन। तर, बाहिरी हावाको प्रभावले आज र भोलि दक्षिणी चीनमा मौसम निकै तातो हुनेछ,’ बुलेटिनमा भनिएको छ।

उत्तरपूर्वी मनसुन भोलि ग्वान्दोङ पुग्ने अनुमान अब्जर्भेटरीको छ। उत्तरतर्फबाट आएको हावाले बुधबार र बिहीबार यस क्षेत्रमा हावाहुरी चल्नेछ।
‘स्थानीय वायुको परिवर्तनको आधारमा अब्जर्भेटरीले कडा मनसुन संकेत जारी गर्नेछ, बुलेटिनमा भनिएको छ, ‘मनसुनको प्रभावले यो साताको मध्य र उत्तरार्धमा स्थानीय मौसम सामान्यतया सफा र सुख्खा रहनेछ।’

यो अवधिमा बिहान र राति केही चिसो हुने तथा सहरी क्षेत्रको न्यूनतम तापक्रम २२ डिग्रीको हाराहारीमा रहने जनाइएको छ।