‘कर्णाली साहित्य महोत्सव’ हुँदै

कर्णालीमा पठन संस्कृतिको संरक्षण गर्नका लागि ‘कर्णाली साहित्य महोत्सव’ हुने भएको छ। कर्णाली प्रदेशमा भाषा, साहित्य र संस्कृतिको संरक्षणसहितको विकास गर्न गर्नका लागि मंगलबार(वैशाख ११) गते महोत्सव हुने भएको हो।

नेपालको पश्चिमी भू–भागको मध्यकालीन इतिहासमा कर्णाली क्षेत्रको भाषा, साहित्य, संस्कृति र पुरातात्विक मौलिक विशेषताहरूको विकास भएको एघारौं शताब्दीदेखि यस भूमिबाट फैलिन थालेको खस सभ्यता र संस्कृति नै हाल विशाल नेपाली राष्ट्रियताको अभिन्न पहिचान बनेकोले कर्णालीको भाषा, साहित्य र संस्कृतिका बिषयमा पठन संस्कृतिको विकास गर्नका लागि महोत्सवको आयोजना गरिएको फ्यचर नेपाल तथा कर्णाली रिडर्स सोसाइटीका संयोजक डा. नवराज केसीले जानकारी दिए।

उनले भने, ‘नेपाली भेषभूषा, रीतिरिवाज, भाषा र परम्पराको सामाजिक, ऐतिहासिक, सांस्कृतिक अध्ययनको निम्ति यो क्षेत्र उर्वर छ। राणाशासनको अन्त्य अघिसम्म गुमनाम रहेको यो क्षेत्रमा त्यसयता विभिन्न कालखण्डमा स्वदेशी तथा विदेशी अध्येताले केही मात्रामा अन्वेषण तथा अनुसन्धान गरेका छन्। यसरी गरिएका अध्ययनहरू पुस्तकका रूपमा छापिए पनि धेरैजसो पुस्तक पाठकको पहुँच छैनन्।’

यस्तै, डाक्टर केसीले योगी नरहरिनाथले कर्णाली प्रदेशको विगत बुझाउने कृतिहरू अचेल बिरलै भेटिने गरेको, त्यसबाहेक, कर्णालीका लेखकका साहित्यिक रचना कृतिहरु र कर्णालीमाथि लेखिएका पुस्तकहरुबारे कर्णालीमै चर्चा हुने अवसर नपाएकोले महोत्सवमा कर्णालीका विषयमा लेखिएका पुस्तक प्रदर्शनीमा राखिने बताए।

उनले भने, ‘त्यस कारण नेपाली भाषा, साहित्यको तिर्थस्थल कर्णालीमा लेखन तथा पठन संस्कृतिको विकास हुनु अपरिहार्य छ। कर्णालीमा लेख्ने, पढ्ने संस्कृतिको विकास गर्नको लागि ‘फ्युचर नेपाल’ ले ‘कर्णाली रिडर्स सोसाइटी’ मार्फत यस क्षेत्रमा पठन संस्कृतिको प्रवद्र्धन गर्न एउटा अभियानको प्रारम्भ गरेको छ’ उनले थपे, ‘यस अभियानले यहाँका प्रचुर सम्भावनाहरुको खोजी गर्ने र अवसर प्रदान गर्ने साझा मञ्चको रुपमा कर्णालीमा बर्षेनी बृहत् ‘कर्णाली साहित्य महोत्सव’ आयोजना गर्ने अवधारण ल्याएको छ।’