कर्णाली प्रदेशका मुख्यमन्त्री जीवनबहादुर शाहीले प्रदेशको विकास र समृद्धिका लागि छ ‘ब’ नीति कार्यान्वयन गर्न जोड दिनुपर्ने बताएका छन्।
प्रदेश सरकारको वार्षिक प्रगति समीक्षा कार्यक्रमका अवसरमा आज वीरेन्द्रनगरमा आयोजित कार्यक्रममा कर्णालीको विकासका लागि छ ‘ब’ को अवधारणा पनि नीति तथा कार्यक्रममै समेटिएको उनले चर्चा गरे।
मुख्यमन्त्री शाहीको भनाइमा छ ‘ब’ भन्नाले बाटो, बिजुली, वन, बजार, व्यवस्थापन र विचार हो। प्रदेश सरकारले चालु आवको नीति तथा कार्यक्रममा यो विषय समावेश गरेर यहाँको विकासको प्रमुख आधारशिलाका रूपमा लिइएको छ। उनले ‘समृद्ध कर्णाली सुखारी कर्णालीवासी’को दीर्घकालीन सोच कार्यान्वयन गर्न छ ‘ब’को अवधारणा लागू गर्नाको विकल्प नभएको बताए।
‘बाटो, बिजुली, वन, बजार, व्यवस्थापन र विचारबिना कर्णालीको समृद्धि सम्भव छैन, बाटो (सडक) बिना त अन्य विकासको कल्पनै नगरौँ’, मुख्यमन्त्री शाहीले भने, ‘कनेक्टिभिटी नै कर्णाली विकासको पहिलो आधार हो, यसको प्रभावकारी कार्यान्वयनतर्फ सबै मन्त्रालय र निकायले ध्यान दिन आवश्यक छ।’
विद्युतीकरणबिना पनि विकासको यात्रा अघि बढ्न नसक्ने उल्लेख गर्दै उनले कर्णालीका पाँच जिल्लामा अझै राष्ट्रिय प्रसारण लाइन नपुगेकाले सङ्घीय सरकारसँग मिलेर विद्युतीकरणमा जोड दिनुपर्ने धारणा राखे।
वन, बहुमूल्य जडीबुटीदेखि उच्च मूल्यका कृषि वस्तुहरूको उर्वरभूमि कर्णालीे रहेको बताउँदै मुख्यमन्त्री शाहीले थपे, ‘वन क्षेत्रको संरक्षण, संवर्द्धन गर्दै यसको उपयोगमा ध्यान दिनुपर्नेछ, सडक, विद्युत्, सञ्चार, वन स्रोत भएर मात्रै पुग्दैन, यसको बजारीकरण र व्यवस्थापनमा ध्यान दिन आवश्यक छ।’
उनले चालु आर्थिक वर्षको पहिलो चौमासिकमा शतप्रतिशत प्रगति गरेर देखाउन र ठूला आयोजनाको भदौ महिनाभित्र बोलपत्र प्रक्रिया सुरु गर्न विभागीय मन्त्री र सचिवहरुलाई निर्देशन दिए। वार्षिक प्रगति समीक्षा कार्यक्रममा प्रदेश सरकारका आठवटै मन्त्रालयले गरेका काम र आगामी योजनाबारे छलफल हुँदै छ।
Shares
प्रतिक्रिया