पाकिस्तानको पञ्जाब प्रान्तमा द्रुत गतिमा हुँइकिएको यात्रुवाहक बसका चालक निदाउँदा पाँच जनाको मृत्यु भएको छ भने २० जना घाइते भएका छन्। दुर्घटनामा तीन महिला र दुई बालबालिकाले ज्यान गुमाएका छन्।
पूर्वी पञ्जाब प्रान्तको राजनपुर जिल्लामा आइतबार उक्त दुर्घना भएको जनाउँदै प्रहरीले घाइतेमध्ये धेरैको अवस्था गम्भीर रहेकाले मृतकको सङ्ख्या बढ्न सक्ने बताएको छ। दुर्घटनाबारे जानकारी पाउनेबित्तिकै प्रहरी र उद्धार टोली घटनास्थल पुगेर शव र घाइतेलाई नजिकैको अस्पताल पुर्याएको प्रमुख अस्लमले सञ्चारकर्मीलाई बताएका छन्।
तीर्थयात्री सवार उक्त बस पञ्जाबको दक्षिणी क्षेत्रमा रहेको सुफी संत सखी सरवरको मन्दिरबाट ज्याकोबाबाद जिल्लातर्फ फर्केको थियो। दुर्घटनामा घाइते भएका बस चालकले यात्रा सुरु गर्नुअघि चरेस खाएको आशङ्का गर्दै स्थानीय प्रहरीले उनको रगत परीक्षण गराउन आदेश दिएको छ। रासस/सिन्ह्वा
Shares
प्रतिक्रिया