लिथुवानियामा नेटो राष्ट्रहरुको दुई दिने शिखर सम्मेलन सुरु भएको छ। उत्तर एटलान्टिक सन्धि संगठनको सदस्य मुलुकका राज्य तथा सरकार प्रमुखहरु भिल्नियसमा भेला भएका छन्।
उद्घाटन समारोहमा नेटोका महासचिव यन्स स्टोल्टेनबर्गले फिनल्यान्डलाई स्वागत गरे। भर्खरै सदस्यता प्राप्त गरेको सो मुलुक पहिलो पटक शिखर सम्मेलनमा सहभागी हुँदैछ।
हाल ३१ सदस्य रहेको नेटोको आगामी सदस्यका रुपमा स्विडेन चयन हुने बताइएको छ।
सम्मेलनको केन्द्रमा युक्रेन देखिन्छ। स्टोल्टेनबर्गले युक्रेनलाई राजनीतिक र व्यावहारिक सहयोग बढाउने बताए, जसले युक्रेनलाई नेटो अझ नजिक ल्याउने उनको भनाइ थियो।
‘आज हामी अझ बलियो गठबन्धनका लागि थुप्रै निर्णय लिनेछौँ। हामी युक्रेनलाई व्यावहारिक र राजनीतिक सहयोग बढाउनेछौँ। यसले युक्रेनलाई नेटोको अझ नजिक ल्याउनेछ,’ उनले भने।
तर, युक्रेनका राष्ट्रपति भ्लादिमिर जेलेन्स्कीले भने यो सम्मेलनले युक्रेनलाई सदस्यताका लागि औपचारिक निम्तो दिनुपर्ने बताएका छन्।
मंगलबार नै जेलेन्स्की भिल्नियस आइपुग्ने कार्यक्रम छ।
Shares
प्रतिक्रिया