युनिकोड
जापानी कम्पनी सुजुकीको पहिलो पूर्ण विद्युतीय कार इ–भिटारा नेपाल आउने भएको छ।
नेपालका लागि सुजुकी चारपांग्रेको आधिकारिक बिक्रेता तथा सीजी होल्डिङ्सको अटोमोबाइल डिभिजन सीजी मोटोकर्पले इ–भिटारा नाडा अटो शोमा प्रदर्शन गर्ने भएको हो।
१७औँ नाडा अटो शो आगामी भदौ ३ देखि ८ गतेसम्म काठमाडौंको भृकुटीमण्डपमा आयोजना हुँदै छ।
कम्पनीले इ–भिटारा नाडामा प्रदर्शनमा राख्ने गरी ल्याउने तयारी अघि बढाएको सीजी मोटोकर्पका सिनियर मार्केटिङ म्यानेजर करुण शाक्यले जानकारी दिए।
‘इ–भिटारा ल्याउने प्रक्रिया अघि बढाएका छौँ। नाडामा ल्याउने प्रयास हो’, उनले भने।
सुजुकीको ईभी चढ्ने चाहना राख्नेले खरिदका लागि भने केही समय पर्खिनुपर्ने हुन्छ। किनभने इ–भिटाराको नाडामा बुकिङ नलिइने कम्पनीले जानकारी दिएको छ।
मारुती इ–भिटारा भारतमा पहिलो पटक भारत मोबिलिटी ग्लोबल एक्स्पो २०२५ मा प्रदर्शन गरिएको थियो। तर हालसम्म इ–भिटारा औपचारिक रुपमा सार्वजनिक भने भएको छैन।
भारतमा इ–भिटारा सेप्टेम्बरमा सार्वजनिक गर्ने योजना छ। सुजुकीको नयाँ ईभी दुई ब्याट्री विकल्पमा उपलब्ध छ। ४९ किलोवाट आवरले ४०० किलोमिटर रेन्ज र ६१ किलोवाट आवर क्षमताको ५०० भन्दा बढी रेन्ज प्रदान गर्ने दाबी गरिएको छ। दुवै भेरियन्टले १८९ एनएम टर्क प्रदान गर्छन्।
१८५ एमएम ग्राउन्ड क्लियरेन्स भएको ईभीको लम्बाइ ४२७५ एमएम, चौडाइ १८०० एमएम र उचाइ १६४० एमएम छ।
प्रतिक्रिया