युनिकोड
पर्यटक, टुर अपरेटर र स्थानीय समुदायलाई नेपाल पर्यटन बोर्डले बदलिँदो प्राकृतिक अवस्थाबारे अवगत गराउँदै सतर्क रहन आग्रह गरेको छ।
सूचना जारी गर्दै बोर्डले पर्यटकहरुलाई आधिकारिक मौसम र यात्राको अपडेट अनुसरण गर्न र सतर्क रहन भनेको छ। त्यसैगरी दर्तावाल कम्पनी र अनुमतिप्राप्त गाइडहरुसँग मात्र यात्रा गर्न सुझाएको छ।
सडक र पुग्ने गन्तव्यको अवस्था बुझेर मात्रै यात्रा गर्न पनि पर्यटकहरुलाई अनुरोध गरिएको छ। केही कठिनाइ भए पर्यटक प्रहरीलाई ११४४ नम्बरमा फोन गर्न आग्रह गरिएको छ।
यता टुर अपरेटरहरुका लागि पनि बोर्डले पर्यटकहरुलाई मौसमी अवस्थाबारे अपडेट गराउन अनुरोध गरेको छ। ड्राइभर र गाइडहरुसँग नियमित सम्पर्कमा रहेर उनीहरुलाई सुरक्षित आवागमन गराउन भनिएको छ। रुटको प्रमाणीकरण र अवस्थाबारे हिँड्नुअघि नै जानकारी गराउन भनिएको छ। यस्तै स्थानीय सरकारी अधिकारी र आकस्मिक अवस्थाका लागि उद्धारकर्ताको सूची राख्न पनि भनिएको छ।
हाल नेपालमा २० हजार पर्यटक घुमिरहेकाले उनीहरुलाई आवश्यक सरसहयोग गर्न स्थानीय समुदायलाई भनिएको छ।
बोर्डले पर्यटकसँग बढी शुल्क नलिन, खाना, आवास र सहयोग सम्भव भएसम्म उपलब्ध गराउन विशेष अनुरोध पनि गरिएको छ।
प्रतिक्रिया