कर नबुझाउने वीरगञ्जका १९ करदाताको बैंक खाता र सम्पति रोक्का

सबै सम्पत्ति रोक्का भएपछि केही करदाता कर बुझाउनसमेत आएका छन्।
    
नियमित बजार अनुगमन थालेपछि आव २०७९\८० मा करदातासमेत बढेका आन्तरिक राजस्व कार्यालय वीरगञ्जले जनाएको छ। आव २०७९/८० मा पर्सामा व्यावसायिकतर्फको करदाता दुई हजार सात सय ५० र व्यक्तिगत १० हजार दुई सय २५ नयाँ करदाता थपिएका छन्। 
    
योसँगै पर्सामा व्यावसायिक ४७ हजार आठ सय ८० र व्यक्तिगत ६६ हजार पाँच सय ५५ गरी एक लाख १५ हजार ४३५ करदाताको सङ्ख्या पुगेको छ। 
    
यसैबीच आन्तरिक राजस्व कार्यालय पर्साले आर्थिक बर्ष २०७९/८० मा सात अर्ब १४ करोड राजस्व सङ्कलन गरेको छ। 
    
सो अवधिमा अन्तशूल्कतर्फ तीन अर्ब, आयकरतर्फ तीन अर्ब, मूल्य अभिवृद्धिकरतर्फ एक अर्ब ७४ करोड, ब्याजकरतर्फ चार करोड र घरबहाल करतर्फ पाँच करोड राजस्व सङ्कलन भएको छ।

कार्यालयले गत आर्थिक बर्ष २०७८/७९ म आठ अर्ब ७१ करोड ६९ लाख ६० हजार राजस्व सङ्कलन गरेको थियो।
    
बढ्दो आर्थिक तरलता, विभिन्न कारण देखाउँदै बैंक तथा वित्तीय संस्थाबाट कर्जा प्रवाह नहुनु, तथा विभिन्न सामानको आयातमा सरकारले गरेको प्रतिबन्धलगायतका कारणले राजस्व सङ्कलन घटेको प्रमुख कर अधिकृत तिवारीको भनाइ छ। रासस