इङ्लिस प्रिमियर लिग फुटबल अन्तर्गत शनिबार राति भएको खेलमा लिभरपुल सजिलै विजयी भएको छ।
लिभरपुलले क्रिस्टल प्यालेसलाई ३-० गोल अन्तरले हराएको हो।
एन्फिल्डमा लिभरपुललाई जिताउन साडियो माने, मोहमद सलाह र नेबी केइटाले एक-एक गोल गरे।
लिभरपुलका लागि खेलको ४३ औं मिनेटमा मानेले पहिलो गोल गर्दै अग्रता दिलाएका थिए। त्यसपछि खेलको ७८ औं मिनेटमा सलाहले गोल गर्दै लिभरपुललाई २-० को अग्रता दिलाए।
खेलको ८९ औं मिनेटमा केइटाले गोल गर्दै लिभरपुललाई ३-० सहज जित दिलाउन सफल भए।
यो जितपछि लिभरपुल प्रिमियर लिगको अंक तालिकामा शीर्ष स्थानमा पुगेको छ। लिभरपुलले ५ खेलबाट १३ अंक जोडेको छ।
प्यालेस ५ खेलमा ५ अंक जोडेर १३ औं स्थानमा छ।
शनिबारै राति भएको खेलमाा आर्सनलले ब्रन्लीलाई १-० गोल अन्तरले पराजित गरेको छ।
आर्सनललाई जिताउने क्रममा खेलको ३० औँ मिनेटमा मार्टिन वडेगार्डले निर्णायक गोल गरेका थिए।
यस्तै शनिबारै राति भएको अर्को खेलमा डिफेन्डिङ च्याम्पियन म्यानचेस्टर सिटी साउथह्याम्पटनसँग गोलरहित बराबरीमा रोकिन पुगेको छ।
यो बराबरीपछि सिटी ५ खेलबाट १० अंकसहित लिगको दोस्रो स्थानमा छ।
Shares
प्रतिक्रिया