विज्ञको चेतावनी : आगामी ३ हप्ता एकदमै जोखिम छ, घरभित्रै बसौं

कोरोना महामारी बढ्दै गएकाले आगामी ३ हप्ता अत्यन्तै कठिन हुने देखिएको जनस्वास्थ्यविद् डा. रवीन्द्र पाण्डेले बताएका छन्।

यसर्थ आगामी ३ हप्ता घरभित्रै बस्न र अति सुरक्षा अपनाउन उनले सुझाव दिएका छन्।

‘आगामी ३ हप्ता नेपालका लागि अत्यन्तै कठिन अवस्था छ, दुःख सहेरै भए पनि यो ३ हप्ता घरभित्र नै बसौं,’ उनले भनेका छन्, ‘जीवनको तुलनामा दुःख सानो हो।’

खाद्यान्न पनि सकभर दैनिक किन्ने नगर्न र आगामी ३ हप्ता भेटघाट बन्द गर्न उनले अनुरोध गरेका छन्।

उनका अनुसार पसल, बाटो, चोक, खेल्ने ठाउँ, गल्ली सबैतिर संक्रमित छन् भन्ने सम्झेर निस्किनै परे डबल मास्क लगाएर र ६ फिटभन्दा धेरै दूरी कायम गरेर गरेर मात्र निस्किनुपर्छ। यस्तै हात साबुनपानी/स्यानिटाइजरले सफा गर्न उनले सुझाव दिएका छन्।

‘यो ३ हप्ता दुःख सह्यौं भने संक्रमणको दर घट्दै जानेछ,’ डा. पाण्डे भन्छन्, ‘रोकथामभन्दा उपचार निकै कठिन र जोखिमपूर्ण छ।’ 

यसपटकको कोरोना भाइरसको प्रजातिलाई नजरअन्दाज नगर्न उनले चेतावनी दिएका छन्।

उनले भनेका छन्, ‘सरकारले कडाइ गरेको हाम्रै लागि हो। हामी सबैजना कडा सेल्फ लकडाउनमा बसौं।’