निषेधाज्ञा उल्लंघन आरोपमा रूपन्देहीमा तीन जना जेल चलान भएका छन्।
कोरोना रोकथामका लागि त्यहाँ जिल्ला प्रशासनबाट जारी निषेधाज्ञा अटेर गरेको र उल्टै प्रहरीसँग निहुँ खोजेको आरोपमा ३ जनालाई जेल पठाइएको हो।
उनीहरूलाई संक्रामक रोग ऐन २०२० को दफा ३ को उपदफा २ बमोजिम जिल्ला प्रशासन कार्यालयले कारबाही गरेको रूपन्देही जिल्ला प्रहरी कार्यालयका प्रवक्ता डीएसपी सत्यनारायण थापाले नेपालखबरलाई जानकारी दिए।
‘निषेधाज्ञा उल्लंघन नगर्न सम्झाईबुझाई गर्दा उल्टै प्रहरी अधिकृतसँग झगडा गरेपछि बिहीबार ८ जनालाई नियन्त्रणमा लिएका थियौं,’ डीएसपी थापाले शुक्रबार बिहान नेपालखबरसँग भने, ‘तीमध्ये ५ जनाले कैद र जरिवानाबापतको रकम तिरे, तर ३ जनाले तिर्न नसक्दा उनीहरूलाई कारागार पठाइएको हो।’
उनका अनुसार सबैलाई जनही ९ हजार १ सय रुपैयाँ जरिवाना तिर्न भनिएको थियो। पक्राउ गरिएका ८ जनामध्ये एक महिला थिइन्।
तर जिल्लाका सिद्धार्थनगर नगरपालिका–८ का २८ वर्षीय श्याम दुबे, मायादेवी गाउँपालिका–४ का २७ वर्षीय दिनेश यादव सोही गाउँपालिकाकै वडा नम्बर २ का ३४ वर्षीय महेन्द्र कोहारले जरिवाना तिर्न नसकेकाले उनीहरूलाई संक्रामक रोग ऐन २०२० को दफा ३ को उपदफा २ बमोजिम प्रमुख जिल्ला अधिकारीले एक महिनाका लागि कारागार पठाएको डीएसपी थापाले जानकारी दिए।
जरिवाना तिरेका खण्डमा भने उनीहरू रिहा हुन सक्ने उनको भनाइ छ।
यो पनि : निषेधाज्ञा उल्लंघन गरे ६ महिनासम्म जेल सजाय हुनसक्छ
प्रतिक्रिया