मिथ्या सूचनाप्रति सचेत रहन पत्रकार महासंघको आग्रह

नेपाल पत्रकार महासंघले निर्वाचनको समयमा सम्प्रेषण हुनसक्ने मिथ्या सूचनाप्रति ख्याल गर्न सञ्चार माध्यमहरूसँग आग्रह गरेको छ।

निर्वाचनका बेला मिथ्या सूचनाबाट मतदातालाई प्रभावित पार्ने सम्भावना रहने भएकाले पत्रकारिताको सिद्धान्त र पत्रकार आचारसंहिताप्रति विशेष ध्यान दिन महासंघ आमसञ्चारमाध्यम र पत्रकारलाई आग्रह गरेको हो।

‘पत्रकारिताको सिद्धान्त र आचारसंहिताको पालना गर्दै प्रेस तथा अभिव्यक्ति स्वतन्त्रता उपभोग गरी स्वस्थ, स्वतन्त्र, धाँधलीरहित शान्तिपूर्ण निर्वाचन सम्पन्न हुने वातावरण निर्माणमा आमसञ्चारमाध्यम र पत्रकारहरूको अहम् भूमिका रहनेमा सन्देह छैन’ महासंघले आज विज्ञप्ति प्रकाशित गरी भनेको छ, ‘यसतर्फ समग्र सञ्चार क्षेत्रले महत्वपूर्ण भूमिका निर्वाह गरिरहेको र गर्दैआएको सर्वविदितै छ।’
 
निर्वाचनको दिन नजिकिएसँगै केही अनलाइन सञ्चारमाध्यम, सामाजिक सञ्जाल तथा युट्युबबाट विचार, प्रचार र समाचार प्रवाह हुँदा पत्रकार आचारसंहिता र निर्वाचन आचारसंहिताको पालनामा ध्यान नदिएको गुनासोप्रति चासो राखेको महासंघले जनाएको छ।

महासंघले निर्वाचनको नतिजा आकलन गरेर प्रकाशित समाचार निर्वाचन आचारसंहिता र पत्रकार आचारसंहिता विपरित रहेको भनी आएका टिप्पणीहरूप्रति ध्यानाकर्षण भएको जनाएको छ।

समग्र सञ्चारमाध्यम र सञ्चारकर्मीहरूलाई निर्वाचन आचारसंहिता र पत्रकार आचारसंहिताको पूर्ण पालना गर्दै आफ्‌ना सामग्रीहरू प्रकाशन र प्रसारण गर्न पनि महासचिव रामप्रसाद दाहालले आग्रह गरेका छन्।