दोलखामा हिमपहिरोमा परेर ३ विदेशीको मृत्यु, नेपालीसहित ८ जना बेपत्ता

दोलखाको यलुङ रि हिमाल आरोहणका लागि गएको विदेशी र स्वदेशीसहित १५ जना आरोहीको टोली हिमपहिरोमा परेको छ। जिल्लाको रोल्वालिङ क्षेत्रमा रहेको यलुङ रि हिमालको बेसक्याम्पनजिकै आज सोमबार हिमपहिरोमा परेका हुन्।  

दोलखाका सहायक प्रमुख जिल्ला अधिकारी औलाखबहादुर आलेका अनुसार ३ जना निधन भएको एकिन भएको छ। 
'हिमपहिरोमा ३ जना विदेशी नागरिकको निधन भएको भनेर विवरण खुलेको छ,' उनले नेपालखबरसँग भने, 'निधन हुनेमा क्यानडा, जर्मनी र फ्रान्सका नागरिक छन्। ८ जना बेपत्ता छन्। बेपत्ता हुनेमा नेपाली पनि रहेको बुझिएको छ। यहाँ ४ जना घाइते पनि छन्। उनीहरूको उद्धार प्रयास भइरहेको छ।' 

दिउँसो केहीबेर हेलिकप्टरमार्फत बेपत्ताको खोजी र घाइतेको उद्धार प्रयास भए पनि मौसम खराब हुँदा सफल नभएको उनको भनाइ छ।  

जिल्ला प्रहरी कार्यालय दोलखाका डीएसपी ज्ञानकुमार महतोका अनुसार ४ जना घाइते अवस्थामै बेसक्याम्प आइपुगेका हुन्।