युनिकोड
रुपन्देहीको गाउँपालिका–१ निवासी २४ वर्षे अजयकुमार नाउ जिल्ला प्रहरी कार्यालय पाल्पामा कार्यरत थिए।
उनी परिवारसँगै बसेर दसैँ मनाउन गाउँ पुगेका थिए। दसैँको अवसरमा गाउँ नजिकै लाग्ने मेला हेर्न गएका नाउ कात्तिक ७ गते दुर्गा मूर्ति विसर्जनका क्रममा नदीमा डुबे।
नाउसँगै अन्य दुई जनाको पनि नदीमा डुबेर मृत्यु भयो । मूर्ति विसर्जनका लागि नदीमा पुगेका अन्य दुई डुबेपछि उनीहरूलाई बचाउन गएका नाउले पनि ज्यान गुमाए।
कोटहीमाई गाउँपालिकाकै वडा नम्बर ५ नजिकका गाउँमा बनाइएका मूर्तिहरू विसर्जन गर्ने चलन छ। दसैँको टीकाका दिन अमरगञ्जसहित अन्य गाउँका ल्याइएका मूर्तिहरू विसर्जन हुँदै थिए।
प्रत्यक्षदर्शी राजदेव भरका अनुसार मूर्तिलाई पानीमा सेलाएपछि अजय भर र सन्तकुमार भरसहितका स्थानीय युवाहरू मूर्तिलाई पूरै डुबाउन भन्दै नदीको गहिरो रहेकोतर्फ जान थाले।
‘अगाडि गहिरो थियो, त्यहाँ जाने क्रममा सन्तकुमार भर डुब्न थाले,’ उनले भने, ‘प्रहरीमा कार्यरत अजयले उनलाई ताने, लगत्तै अर्का युवा अजय भर पनि डुब्न थाले, उनलाई जोगाउन सन्तकुमार र अजय नाउ अगाडि बढे, यसै क्रममा तीनैजना नै डुबे।’
दानव नदी गहिरो रहेको र तत्काल कोही पौडी खेल्न नजान्ने भएकाले तीनै जना नदीमा हराएको उनको भनाई छ। दुर्गा मूर्ति बिसर्जनमा गएका कोटहीमाई गाउँपालिका–१ बस्ने १८ वर्षीय अजय राजभर, २४ वर्षीय अजयकुमार नाउ र २० वर्षीय सन्तकुमार भरको मृत्यु भयो।
दसैँको दश दिनसम्म हर्षोल्लास गरी दसैँ मनाएका यी तीनजना गाउँले युवाहरू एकैसाथ अस्ताए । तीनजना युवालाई गुमाएको अमरगञ्ज गाउँ त्यसयता शोकमा डुबेको छ।
डुबेकामध्ये अजयकुमार नाउ र अजय भरको शव केही घण्टामै फेला परे पनि सन्तकुमार भरको शव करिब ४७ घण्टापछि मात्र फेला परेको छ। उनको शव फेला पर्दासम्म उहाकै भाइ पर्ने अजय भरको त्रिवेणीमा र अजयकुमार नाउको दानव खोलामा अन्त्येष्टि भइसकेको थियो।
प्रहरी जवान अजयकुमार नाउको डेढ वर्षअघि मात्र विवाह भएको थियो। बाँकी दुईजना अविवाहित थिए।
‘दुर्गा मूर्ति विसर्जनमा युवाहरूमा अर्कै जोस हुन्छ’, कोटहीमाई गाउँपालिका–१ का वडा अध्यक्ष राजेश गुप्ताले भने, ‘यो दुर्घटनाले हामीलाई गम्भीर बनाएको छ, आगामी दिनमा यससम्बन्धी कठोर कदम चाल्नैपर्ने देखिएको छ।’
उनले विसर्जनअघि स्थानीय युवासँग यस विषयमा छलफल पनि गरेको दाबी गरे।
इलाका प्रहरी कार्यालय मझगावाका प्रहरी निरीक्षक हिमनाथ घिमिरेले पनि व्यस्थापनमा कुनै कमी नरहेको दाबी गरे।
‘यसअघिका वर्षमा नदी वारि घटना हुने गरेको थियो, हामीले सोहीअनुसार तयारी गरेका थियौँ,’ उनले भने, ‘नदीमा निश्चित क्षेत्रसम्म जान मिल्ने गरी भीड व्यवस्थापन गरेका थियौँ, तर घटना पारिपट्टी भयो।’
दानव नदी पारि कोटहीमाई गाउँपालिका–५ को क्षेत्र इलाका प्रहरी कार्यालय लुम्बिनीअन्तर्गत पर्छ। रासस
प्रतिक्रिया