नेकपा माओवादी केन्द्रका उम्मेदवारले जितेको ६ दिनपछि भेटिएको मत गन्दा बराबरी मत भएको छ।
महोत्तरीको बर्दिबास नगरपालिकामा एउटा मतपेटिकाको मतै नगनी वडाध्यक्ष विजयी भएको घोषणा ६ दिनपछि यस्तो नतिजा आएको हो।
बर्दिबास वडा नम्बर-८ को नतिजा सार्वजनिक भएको ६ दिनपछि खोल्दै नखोलिएको एउटा मतपेटिका फेला परेपछि तनाव भएको थियो।
तर उक्त मतपेटिकाको मत गन्दा जितिसकेका माओवादी उम्मेदवार र पराजित भएका एमाले उम्मेदवारको मत बराबरी भएको हो। वैशाख ३१ मा विजयी माओवादीका लामाले ७५१ मत पाएका थिए भने एमालेका मगरले ७४४ मत पाएका थिए।
बर्दिबास नगरपालिकाको कभर्ड हलमा भेटिएको मतपेटिका खोल्दा जितिसकेका माओवादी केन्द्रका शमशेर सिंह र पराजित भइसकेका एमालेका रुद्रबहादुर किङ्गरिग मगरले बराबरी ७६७ मत ल्याएका हुन्।
जितिसकेका माओवादी उम्मेदवार र पराजित भइसकेका एमाले उम्मेदवारको मत बराबरी भएपछि निर्वाचन अधिकृतको कार्यालयले थप निर्णय लिइसकेको छैन।
सबै वडाको मतगणना सकेर बर्दिबास ९ को अन्तिम गणना चलिरहँदा ६ दिनअघि नै गणना सकिएको बर्दिबास ८ को एउटा मतपेटिकाले जितिसकेका माओवादी उम्मेदवारलाई तनाव दिएको छ।
गत वैशाख ३१ गते नै बर्दिबास -८ को मतगणना सकेर परिणाम सार्वजनिक गरिएको थियो। त्यसबेला निर्वाचन अधिकृतले बर्दिबास-८ मा माओवादी उम्मेदवार शमशेरसिंह लामा एमालेका रुद्रबहादुर किङ्गरिङ मगरलाई पराजित गर्दै विजयी बनेको घोषणा गरेका थिए।
विजेताको टुंगो लागिसकेको वडाको नगनिएको मतपेटिका भेटिएपछि सर्वदलीय बैठक बसेर गनिएको थियो। तर अब दुई उम्मेदवारको मत बराबरी भएपछि निर्वाचन अधिकृतसँग गोलाप्रथाको विकल्प आएको छ।
Shares
प्रतिक्रिया