मध्यपूर्वका उडान अवरुद्ध हुँदा हङकङ विमानस्थलमा यात्रु अलपत्र

इरानमा अमेरिकी-इजरायली संयुक्त आक्रमणको असर हङकङ विमानस्थलमा पनि देखिएको छ। आइतबार हङकङबाट मध्यपूर्वी गन्तव्यका कम्तीमा २७ उडान प्रभावित हुँदा यात्रुहरू विमानस्थलमा अलपत्र परेका छन्।

विशेषगरी साउदी अरबको रियाद, कतारको दोहा र संयुक्त अरब इमिरेट्स (यूएई)को दुबईको लागि टिकट लिएका सयौँ यात्रुको आइतबार विमानस्थलमा निराश मुद्रामा थिए।

यी निराश यात्रुमध्ये एक थिए सांघाई सफ्टवेयर आर्किटेक्ट ४५ वर्षीय लुओ कुई। शनिबार साँझ ५ बजे निर्धारित क्याथेको दुबईको उडान रद्द भएपछि पनि रातभर विमानस्थलमै अलपत्र बने।

आइतबार बिहान एयरलाइन्सले उनलाई दुई विकल्प दियो– १) मार्च ४ का लागि टिकट सार्ने (अस्थायी) र  प्रस्थान नभएसम्म आवासको खर्च आफै बेहोर्ने। २) टिकट परिवर्तन गरेर सांघाई फर्कने।

तर, उनलाई यी दुवै विकल्प मन परेन। दुई वर्षदेखि अबुधाबीमा काम गरिरहेका लुओलाई उद्धृत गर्दै साउथ चाइना मर्निङ पोस्ट लेख्छ, ‘यो उचित छैन। साङ्घाईबाट हङकङको उडानमा केही घण्टा मात्र लाग्छ, हङकङबाट अबुधाबी उडान गर्न लाग्ने समयको लगभग एक तिहाइ। त्यसैले, एयरलाइन्सले लागत कट्टा गरेर हामीलाई पैसा फिर्ता गर्नुपर्छ।’

इरानमा अमेरिका र इजरायली आक्रमणका कारण हङकङबाट मध्यपूर्व जाने यात्रु र कार्गो उडान एयरलाइन्सहरूले रद्द गरेका छन्। उडान रद्द गर्ने एयरलाइन्समध्ये क्याथे प्यासिफिक एयरवेज पनि रहेको छ। लुओले आबुधाबी उडानका लागि क्याथेको टिकट लिएका थिए।
हङकङको प्रमुख वाहक क्याथे प्यासिफिक एयरवेज शनिबार मध्यपूर्व जाने र जाने सबै यात्रु र कार्गो उडानहरू स्थगित गर्ने एयरलाइन्सहरूमध्ये एक थियो, हवाई आक्रमणपछि हवाई क्षेत्र बन्द भएपछि।

शनिबार भएको इजराइल-अमेरिकी संयुक्त आक्रमणमा इरानका सर्वोच्च नेता आयातोल्लाह अली खामेनी मारिएका छन्। इरानको सरकारी टीभी च्यानलका अनुसार इरानको सर्वोच्च राष्ट्रिय सुरक्षा परिषद्ले खामेनी शनिबार बिहान आफ्नै कार्यालयमा काममा व्यस्त रहेका बेला मारिएको बताएको छ। 

आफ्ना सर्वोच्च नेता मारिएपछि इरानले पनि इजराइल-अमेरिकाविरुद्ध ‘इतिहासकै खतरनाक आक्रमण’ गर्ने चेतावनी दिएको छ।

इरानको यो अभिव्यक्तिविरुद्ध अमेरिकी राष्ट्रपति डोनाल्ड ट्रम्पले त्यसो गरिए अझ कडा आक्रमण गरिने जवाफ दिएका छन्। ट्रम्पले ट्रुथ सोसलमा लेखेका छन्, ‘इरानले भर्खरै यसअघि कहिल्यै नगरिएको धेरै शक्तिशाली आक्रमण गर्ने भनेको छ। तर, त्यसो नगर्नु उसका लागि राम्रो हुनेछ। किनकि त्यसो गर्‍यो भने हामी त्यस्तो भीषण आक्रमण गर्नेछौँ, जुन उसले यसअघि कहिल्यै देखेको थिएन।’

हालसम्म कहाँ के भयो?
कतारको राजधानी दोहामा ११ वटा विस्फोट
कतारको राजधानी दोहामा धेरैवटा विस्फोट सुनिएका छन्।
मिडिया रिपोर्टले कम्तीमा ११ वटा विस्फोट भएको संकेत गरेका छन्।
तर विस्फोट के कारणले भयो वा के कति क्षति भयो भन्ने कुरा अझै स्पष्ट भएको छैन।

यूएईमा १ मृत्यु ११, जना घाइते
इरानको आक्रमणबाट यूएईमा १ जनाको मृत्यु भएको छ भने ११ जना घाइते भएका छन्। 
अन्तर्राष्ट्रिय सञ्चारमाध्यमका अनुसार दुबई अन्तर्राष्ट्रिय विमानस्थलमा भएको विस्फोटमा ४ जना घाइते भएका छन्।
यस्तै अबुधाबीको जायद अन्तर्राष्ट्रिय विमानस्थलमा एकजना एसियाली नागरिक मारिएका छन् भने ७ जना घाइते भएको यूएई सरकारले जनाएको छ।

कतारमा १६ जना घाइते
कतारको गृह मन्त्रालयले इरानको आक्रमणबाट थप ८ जना घाइते भएको जानकारी दिएको छ। 
योसँगै इरानी आक्रमणबाट अहिलेसम्म घाइते भएकाको कुल संख्या १६ पुगेको छ।