हङकङमा भोलि टी१ संकेत लागु हुन सक्ने

यिनक्सिङ आँधी भोलि (बिहीबार) राति वा शुक्रबार बिहान हङकङबाट ८०० किलोमिटरको दूरीभित्र प्रवेश गर्ने अब्जर्भेटरीले जनाएको छ। यो सँगै बिहीबार राति वा शुक्रबार बिहानसम्म स्ट्यान्डबाइ संकेत नम्बर १ जारी गर्ने तयारी अब्जर्भेटरीको छ।

अहिले यसको केन्द्रमा १४५ किलोमिटर प्रतिघण्टाका दरले हावाको वेग रहेको यो आँधी चाँडै नै ठूलो आँधीमा परिणत हुने अनुमान पूर्वानुमानकर्ताले गरेका छन्।

बुधबार बिहान १० बजे यो फिलिपिन्सको राजधानी मनिलाबाट ५६० किलोमिटर उत्तरपूर्वमा केन्द्रित थियो। अहिले लुजोन स्ट्रेटको पूर्वमा रहेको र लगभग १२ किलोमिटर प्रतिघण्टाको गतिमा उत्तरपश्चिम सर्ने अनि क्रमशः तीव्र हुने अनुमान गरिएको हो।

अब्जर्भेटरीका अनुसार यो आँधी बिहीबारसम्ममा ठूलो टाइफुनमा विकसित हुन सक्छ। ‘यिनक्सिङ र पर्ल नदी मुहानबीचको दूरी, यसको तीव्रतामा परिवर्तन र स्थानीय हावाको अवस्था परिवर्तनको आधारमा स्ट्यान्डबाइ संकेत नम्बर १ जारी गर्ने आवश्यकताको मूल्यांकन गरिनेछ,’ अब्जर्भेटरीले भनेको छ।