युनिकोड
हमासले इजरायलको तेल अभिभमा तीनवटा रकेट प्रहार गरेको बताएको छ।
इजरायलले गाजामा आफ्नो सैन्य आक्रमण पुनः सुरु गरेपछि हमासको यो पहिलो प्रतिशोधात्मक आक्रमण हो।
यद्यपि, इजरायलले तीनवटा क्षेप्यास्त्रमध्ये एउटालाई रोकेको र बाँकी क्षेप्यास्त्र कोही पनि नबस्ने ठाउँमा खसेको बताएको छ।
हमासद्वारा सञ्चालित गाजा स्वास्थ्य मन्त्रालयका अनुसार मंगलबारदेखि इजरायलले पुनः युद्ध सुरु गरेदेखि कम्तीमा ५९१ जनाको मृत्यु भइसकेको छ, जसमा २०० भन्दा बढी बालबालिका पनि छन्।
इजरायली सेना (आईडीएफ) ले बिहीबार प्यालेस्टिनी क्षेत्रमा स्थलगत कारबाही सुरु गरेको बताएको छ।
जनवरी १९ देखि मार्च ३० सम्म इजरायल र हमासबीच युद्धविराम भए पनि यसको अवधि लम्ब्याउने सहमति हुन नसक्दा इजरायलले गाजामा फेरि हमला सुरु गरेको हो।
इजरायलले हमासले अझै पनि ५९ जनालाई बन्धक बनाएको बताएको छ, जसमध्ये २४ जना जीवित रहेको अनुमान गरिएको छ।
हमास र इजरायलबीच पुन: युद्ध सुरु भएसँगै बन्धक बनाइएका नेपाली विद्यार्थी विपिन जोशी रिहा हुने आशामा पनि तुषारापात भएको छ।
गत जनवरी १९ देखि मार्च ३० सम्म भएको युद्धविरामका क्रममा हमासले २५ जना जीवित र ८ जना मृत बन्धक इजरायललाई फिर्ता गरेको छ भने बदलामा इजरायलले १ हजार ९ सय प्यालेस्टिनी कैदीबन्दी रिहा गरेको छ।
हमासले ७ अक्टोबर २०२३ मा इजरायलमा आक्रमण गरेको थियो। जसमा परी १,२०० जनाको मृत्यु भएको थियो भने २५१ जनालाई बन्धक बनाइएको थियो।
प्रतिक्रिया