नेपाली फिल्म ‘होस्टेल’ को तेस्रो भागमा चर्चित टिकटकर ‘कुल ब्वाइ’ नामबाट परिचित पारस बम अनुबन्धित भएका छन्। टिकटकर हुँदै ‘भिडियो कन्टेन्ट कृयटर’ को रूपमा चर्चित बमलाई फिल्मको प्रमुख पात्रहरूमध्ये एकको लागि अनुबन्धित गरिएको निर्देशक सशान कँडेलले जानकारी दिए।
होस्टेलमा बसेर अध्ययन गरिरहेका ‘किशोरकिशोरी’ र उनीहरूको भविष्यका घटनाहरूमा आधारित रहेर बन्न लागेको यस फिल्मबाट डेब्यु गर्न लागेका पारस गायक समेत हुन्। उनले ‘कान्छी कता हिँडेको’, ‘बुवाको नाक होस’ लगायतका चर्चित गीत गाइसकेका छन्।
चलचित्रको स्क्रिप्टले ‘डिमान्ड’ गरेको पात्र अनुसार बम सबै पक्षबाट उत्तम रहेको कारण अनुबन्ध गरिएको निर्देशक कँडेलले बताए। उनले यस चलचित्रबाट पनि अघिल्ला भागहरूमा जस्तै कुल ब्वाइ सहितका अन्य केही स्टार कलाकारको जन्म हुने जनाए।
नेपाली चलचित्र क्षेत्रमा थुप्रै स्टार कलाकारहरू जन्माएको बहुचर्चित फिल्म हो। ‘होस्टेल’बाट अनमोल केसी, सलोन बस्नेत, प्रकृति श्रेष्ठ लगायतका कलाकारहरूले डेब्यु गरेका थिए।
त्यस्तै, ‘होस्टेल रिटर्न्स’बाट स्वस्तिमा खड्का, सुशील श्रेष्ठ, नजिर हुसेन, सुशील सिटौला लगायतका कलाकारहरूले डेब्यु गरेका थिए।
उनीहरू सबै नेपाली चलचित्रका सफल कलाकार बन्न सफल भएका छन्।
‘होस्टेल ३’को लागि माधव शर्माले स्क्रिप्ट लेखेका छन्। यसको कथा भने निर्देशक कँडेलले नै लेखेका हुन्।
यसअघि बनेका ‘होस्टेल’ र ‘होस्टेल रिटर्न्स’लाई सुनिल रावलले बनाएका थिए भने ‘होस्टेल ३’लाई भने सम्मान इन्टरटेन्मेन्टले आरोन कन फिल्म्ससँगको सहकार्यमा बनाउँदै छ।
यसका निर्माताहरू शिशिर ज्ञवाली, कार्यकारी निर्माता शङ्कर कोइराला, सह निर्माताहरू सुधा मरहट्ठा, सुरेश कँडेल र अर्जुन सापकोटा हुन्।
वि.सं. २०७० सालमा रिलिज भएको ‘होस्टेल’ र २०७२ मा रिलिज भएको ‘होस्टेल रिटर्न्स’ बक्स अफिसमा सफल भएका थिए।
‘होस्टेल ३’का निर्देशक कँडेलले तेस्रो भागमा होस्टेलमा बसेर अध्ययन गरिरहेका किशोरकिशोरी र उनीहरूको भविष्यका घटनाहरूमा आधारित रहने बताएका छन्। यस वर्षको अन्त्यतिर ‘होस्टेल ३’को रिलिज लक्ष्य राखिएको छ।
Shares
प्रतिक्रिया