कोपा अमेरिका: उरुग्वेको जितमा सुआरेज र काभानीको गोल

लुइस सुआरेज र एडिन्सन काभानीको गोलमा उरुग्वेले कोपा अमेरिका २०१९ अन्तर्गत सोमबार बिहान भएको खेलमा इक्वेडरमाथि ४-० को सहज जित हात पारेको छ। 

काभानी र सुआरेजसँगै निकोलस लोदेईरोले गोल गरेका थिए भने एक गोल भने उरुग्वेले आत्मघाति उपहार पाएको थियो। 

लोदेईरोले खेलको छैटौ मिनेटमा उरुग्वेलाई सुरुवाति अग्रता दिलाए। २४ औ मिनेटमा जोसे किन्टोसले रातो कार्ड पाउँदै मैदान छाडेपछि इक्वेडर १० खेलाडीमा सिमित रह्यो।

३३ औ मिनेटमा काभानी र ४४ औ मिनेटमा स्वारेजको गोलसँगै पहिलो हाफमा उरुग्वेलाई ३–० को अग्रता मिल्यो। अतुर्रो मिनाले ७८ औ मिनेटमा आत्मघाति गोल गरेपछि उरुग्वेले ४–०को सहज जित निकाल्यो।