यस्तो छ साफ च्याम्पियनसिप फाइनलमा भारतविरुद्ध खेल्ने नेपालको सुरुवाती-११

भारतविरुद्ध साफ च्याम्पियन्ससिपको फाइनलमा खेल्ने नेपाली सुरुवाती-११ सार्वजनिक भएको छ।

नेपाली टोलीको गोलरक्षकमा किरण कुमार लिम्बुसहित दिनेश राजवंशी, अनन्त तामाङ, पुजन उपरकोटी, नवयुग श्रेष्ठ, रोहित चन्द, सुमन अर्याल, गौतम श्रेष्ठ, तेज तामाङ र सुजल श्रेष्ठ रहेका छन।   

 

नेपाली टोलीका मुख्य फरवर्ड अन्जन विष्टले लगातार दुई खेलमा पहेँलो कार्ड पाएपछि फाइनल गुमाएका छन्। अन्जनले लिग चरणको अन्तिम खेलमा बंगलादेशविरुद्ध पेनाल्टीमा गोल गरेपछि नेपाल पहिलोपल्ट साफको फाइनलमा पुगेको हो। जारी साफमा उनले २ गोल गरिसकेका छन्।  

दक्षिण एसियाली क्षेत्रको सबैभन्दा ठूलो फुटबल प्रतियोगिता साफ च्याम्पियनसिपको ३ दशक लामो इतिहासमा हालसम्म ५ पटकसम्म सेमिफाइनलमा पुगेपनि नेपालले फाइनलमा स्थान बनाउन सकेको थिएन। 

सन् २०१८ मा भएको साफको सेमिफाइनमा नेपाल माल्दिभ्ससँग ३–० ले पराजित हुँदै बाहिरिएको थियो। त्यसअघि सन् १९९९, १९९५, २०११ र २०१३ मा नेपाल सेमिफाइनलबाट अघि बढ्न सकेन।

साफमा भारत सर्वाधिक सफल टोली हो। भारतले हालसम्म ७ पटक साफको उपाधि जितिसकेको छ। माल्दिभ्सले दुई, बगंलादेश, श्रीलंका र अफगानिस्तानले एक–एक पटक साफको उपाधि जितेका छन्। 

साफ च्याम्पियनसिपमा नेपाल र भारत हालसम्म ७ पटक आमने सामने भएका छन्। ६ पल्ट नतिजा भारतको पक्षमा हुँदा २०१३ को साफमा भने नेपालले भारतलाई २–१ गोल अन्तरले पराजित गरेको थियो। 

समग्रमा नेपाल र भारतबीच अहिलेसम्म २२ खेल भएको छ। जसमा भारतले १५ खेलमा जित जित्दा नेपालले २ खेलमा मात्रै जितेको छ। नेपालले भारतलाई सन् २०१३ को साफ र १९९३ को बगंलादेशको ढाकामा भएको प्रतियोगितामा हराएको थियो।  यी दुई टोलबीचका ५ खेल भने बराबरीमा सकिएका छन्।