फेला पारेका वा चोरी भएका सामान फिर्ता गर्न अख्तियारको आग्रह

अख्तियार दुरुपयोग अनुसन्धान आयोगले हराएका तथा चोरी भएका जिन्सी सामान फेला पार्नेलाई फिर्ता गरिदिन आग्रह गरेको छ।

आइतबार सार्वजनिक सूचना प्रकाशित गरी अख्तियारले भदौ २४ गतेको आन्दोलनको क्रममा आयोग र मातहतका कार्यालयहरु (इटहरी, हेटौँडा, पोखरा, बुटवल लगायत) मा भएको तोडफोड, आगजनी र चोरी एवं लुटपाटबाट सवारी साधनहरू (चार पाङ्ग्रे र दुई पाङ्ग्रे), टीभी, कम्प्युटर सेट, माइक्रो ओभन, विभिन्न साइजका हार्ड डिस्क, स्क्यानर, क्यामरा, आइप्याड, मोवाइल, ल्यापटप, हिटर, पा लगायतका सामानहरु लुटपाट एवं चोरी भएको जनाएको छ।

उक्त तोडफोड र चोरीमा संलग्नहरूको सीसीटीभी फुटेज मार्फत पहिचान गर्ने कार्य भैरहेको भन्दै कोही कसैले आयोग र आयोग मातहत कार्यालय परिसरबाट यस्ता सामग्री लिएको वा प्राप्त गर्नु भएको भए उक्त सामग्रीहरु काठमाडौको हकमा प्रहरी वृत्त मालीगाउँ, काठमाडौ वा यस आयोगको कार्यालय टङ्गालमा र आयोगका मातहत कार्यालयको हकमा तत् तत् कार्यालय वा नजिकको प्रहरी कार्यालयमा आई सामान बुझाई दिनुहुन अनुरोध गरिएको छ।

अन्यथा कानुन बमोजिम कारबाही गर्ने पनि अख्तियारले चेतावनी दिएको छ।