युनिकोड
काठमाडौं महानगरपालिकामा निष्क्रिय भएका ब्रुमरहरु संचालनमा आएका छन्। आजबाट काठमाडौंमा ५ वटा ब्रुमरले सफाइ थालेको महानगरपालिकाका मेयर बालेन्द्र शाहले जानकारी दिए।
‘सानातिना मर्मत लगायतका कामहरु पनि नभएर लगभग निष्क्रिय भएर बसेका ब्रुमरहरुको मर्मत भएर काम सुरु हुन थालेका छन्,’ शाहले भने।
भोलिदेखि अन्य ४ वटा ब्रुमरहरु सरसफाइका लागि थपिने उनले जानकारी गराएका छन्। ‘आजदेखि ५ वटा ब्रुमरले काठमाडौं सफाइ गर्न थालेका छन्, भोलिदेखि ४ वटा ब्रुमरहरु पनि थपिएर ९ वटा ब्रुमरहरुले नियमित सफा गर्नेछन्।’ उनले भने।
वर्षायामका बाबजुत पनि काठमाडौंलाई धुलोरहित बनाउने अभियानमा ब्रुमरहरु सहयोगीसिद्ध हुने विश्वास मेयर शाहले गरेका छन्। ‘बर्षायाम भएकाले केही असहजता पक्कै हुनेछन् तर आवश्यक ठाउँमा सकेसम्म चाँडो पुगेर काठमाडौंलाई धुलोरहित बनाउने अभियानमा ब्रुमरहरु सहयोगीसिद्ध हुनेछन् भन्ने विश्वास छ।’ उनले भने। काठमाडौं महानगरपालिकामा यसअघि नै प्रयोगमा आइसकेका ब्रुमरहरु बिग्रिएपछि थन्किएका थिए।
प्रतिक्रिया