चितुवाको आक्रमणबाट ज्यान गुमाएकी तनहुँको बन्दीपुर गाउँपालिका–५ बाहुनभञ्ज्याङकी बालिकाको परिवारलाई राहत प्रदान गरिएको छ। बन्दीपुर गाउँपालिका र डिभिजन वन कार्यालयले किरिया खर्चबापत बालिकाको परिवारलाई एक लाख प्रदान गरेका हुन्।
गत सोमबार साँझ चितुवाको आक्रमणमा परी नौ वर्षीया बालिका स्वीकृति थापाको मृत्यु भएको थियो। गाउँपालिकाका अध्यक्ष पूर्णसिं थापाले मृतक बालिकाको हजुरबुबा यामबहादुर थापालाई उक्त रकम प्रदान गरेका हुन्। दुवै निकायले राहतस्वरुप तत्कालका लागि ५०÷५० हजार सहयोग गरेका हुन्।
चितुवाको आक्रमणबाट ज्यान गुमाउनेका परिवारलाई वन कार्यालयले दश लाख राहत प्रदान गर्दै आएको छ। तत्कालका लागि ५० हजार वितरण भएकाले थप नौ लाख ५० हजार केही दिनभित्र उपलब्ध गराइने वन कार्यालयले जनाएको छ।
अध्यक्ष थापाले मानिसको जीवनसँग पैसाको तुलना हुन नसक्ने भन्दै पीडितलाई मलम लगाउन र सरकार जनताको साथमा छ भन्ने अनुभूति दिलाउन राहत रकम उपलब्ध गराइएको बताए। रासस
Shares
प्रतिक्रिया