युनिकोड
सप्तकोसी नदीले आफ्नो बाटो परिवर्तन गरेर पश्चिमी तटलाई कटान गर्न थालेपछि उदयपुर र सप्तरीका जनता जोखिममा परेका छन् ।
तर, यो जोखिम कोसी ब्यारेजको माथिल्लो भागमा मात्र सीमित रहने र बाढी सप्तकोसीको पुलभन्दा माथिकै भागमा मिसिने भएकाले पुलमुनिका बस्तीमा भने असर नपर्ने पूर्वानुमान गरिएको छ ।
०६५ सालमा सप्तकोसीको पूर्वी तट फुटेर नदी बस्तीमा पसेको थियो । र, यसले नेपाल मात्र नभएर भारतीय बस्तीहरुसमेत डुबान र कटान भएका थिए ।
पश्चिम तटमा पस्न थालेको यसपटकको बाढीले पुलदेखि माथिको नेपाली भूभागमा मात्रै असर पार्ने देखिएको स्थानीय बताउँछन् ।
स्थानीयले दिएको जानकारी अनुसार बाढी चताराधामको नजिकैबाट पश्चिमतर्फ पस्न थालेको छ र यसले बेलका नगरपालिकाका २० हजार जनसंख्या प्रभावित गराउने जोखिम बढेको छ ।
यो बस्ती सप्तकोसीको पुरानो बाटोमा करिब ३० वर्षअघि देखि बस्न थालेको हो । यहाँ खोटाङ, भोजपुरतिरबाट बसाइँ आउने क्रम बढेसँगै वस्ती विकास भएको हो ।
तर, बेलकामा पसेको बाढी वडा नम्बर २ स्थित भागलपुरसम्मै पुग्यो भनेचाहिँ यसले ५०–६० वर्ष पुरानो बस्तीलाई पनि प्रभावित बनाउने र त्रियुगा नदीमा मिसिएर बाढी पुनः सप्तकोसीमा फर्कने सम्भावना रहेको स्थानीयको भनाइ छ ।
गुगल म्यापमा हेरौं जोखिमपूर्ण बस्तीको तस्बिर–
प्रतिक्रिया