अमेरिकाको राष्ट्रपति बनेपछि बाइडेनले पुटिनसँग जेनेभामा पहिलोपटक भेट गरेका हुन्।
निकै नै महत्वका साथ हेरिएको बाइडेन र पुटिनबीचको वार्ता यतिबेला सुरुवात भएको बताइएको छ।
पुटिनले छलफल अगाडि अमेरिकासँगको वार्ता रचनात्मक र फलदायी हुने अपेक्षा गरेको एबीसी न्युजले जनाएको छ।
मंगलबार भेट अगाडि बाइडेनले पुटिनलाई सक्षम विरोधीको संज्ञा दिएका थिए।
बाइडेनले पुटिनसँग भेट्न अगाडि जी७ सम्मेलन र नेटो गठबन्धनको बैठकमा पनि भाग लिइसकेका छन्। सो बैठकमा अमेरिकाले चीनलाई घेर्ने र एक्ल्याउने रणनीति लिएको थियो।
तर मंगलबार मात्र पुटिनले भने चीन आफ्नो मित्र भएको बताएको थियो।
पुटिनले अमेरिकाले रुसलाई शत्रु नै घोषणा गरेको पनि बताएका थिए। हाल चीन र अमेरिकाको सम्बन्ध निकै खराब अवस्थाबाट गुज्रिरहेको अवस्थामा यो भेटलाई चासोका साथ हेरिएको छ।
बीबीसीका अनुसार यी दुई नेताबीच हतियार नियन्त्रण तथा अमेरिकाले लगाउँदै आएकाे आराेप रुसी साइबर आक्रमणको विषयमा छलफल हुनेछ।
जेनेभामा स्वीस राष्ट्रपति गाइ पर्मेलिनले दुवै नेतालाई स्वागत गरेर बैठक उपलब्धिमूलक होस् भनेर कामना गरेका थिए।
Shares
प्रतिक्रिया