अध्यक्ष ओलीसँग नेपाल पक्षको बटमलाइनः २०७५ जेठ २ गतेको संगठन ब्युँताइयोस्

नेकपा एमालेको माधवकुमार नेपाल समूहले २०७५ जेठ २ गतेको पार्टी संगठन ब्युँत्याउनका लागि आज साँझ ४ बजेसम्मको समयसीमा तोकेको छ।

प्रधानमन्त्री केपी शर्मा ओलीको अध्यक्षतामा आज बिहीबार बसेको स्थायी कमिटीको बैठकले नेपालसहितका चार नेतामाथि कारबाही फुकुवा गर्ने निर्णय गरेको थियो । ओलीबाट चालिएको सो कदमपछि बसेको नेपाल पक्षको स्थायी कमिटीको बैठकले सो समय तोकेको हो।

‘विभिन्न स्रोतहरुबाट जेठ २ मा फर्किने सन्देशहरु आएका छन्। तर यो झुक्याउनका लागि पनि हुनसक्छ। यसको प्रमाणिकता खोजेका छौं,’ उपमहासचिव घनश्याम भूसालले भने, ‘यस विषय औपचारिक र सामूहिक छलफलमा आउनुपर्छ।’

नेता नेपालसहित उपाध्यक्ष भीम रावल, उपमहासचिव भुसाल र स्थायी कमिटीका सदस्य सुरेन्द्र पाण्डेमाथि पार्टीविपरित काम गरेको भन्दै एमालेले ६ महिनाका लागि निलम्बन गरेको थियो।