युनिकोड
राष्ट्रियसभामा रिक्त हुन लागेका १८ सिटका लागि आज देशका सातै प्रदेशमा निर्वाचन हुँदैछ।
बागमती प्रदेशमा रिक्त हुन लागेका २ सिटका लागि आज प्रदेश राजधानी हेटौँडामा मतदानको तयारी भएको छ। राष्ट्रियसभा सदस्यका लागि बागमती प्रदेशबाट ६ जनाले उम्मेदवारी दर्ता गराएका छन्।
नेपाली कांग्रेस र नेकपा एमालेको २ सिटमा भागबण्डा गरेर उम्मेदवारी छन्। दिएका छन्। मतभारअनुसार दुई दलसँग स्पष्ट बहुमत रहेकाले कांग्रेस एमालेले खडा गरेका उम्मेदवार निर्वाचनमा विजयी हुने निश्चित प्रायः छ।
भागबन्डामा एमालेका प्रेम दंगाल र कांग्रेसकी गीता देवकोटा उम्मेदवार बनेका छन्। दंगाल अन्य र देवकोटा महिला क्लस्टरबाट उम्मेदवार बनेका हुन्।
नेपाली कम्युनिस्ट पार्टी (नेकपा) को तर्फबाट बागमती प्रदेशमा अन्यतर्फ प्रेम सापकोटा र महिला क्लस्टरमा सरोज कुमारी झा उम्मेदवार बनेकी छन् भने नेपाल मजदुर किसान पाटी (नेमकिपा) का तर्फबाट २ जना उम्मेदवार छन्।
नेमकिपाबाट विक्रम ढुकुछु र कविता महर्जन उम्मेदवार छन्।
बागमती प्रदेश सभामा हाल ३६ सिट रहेको कांग्रेसको प्रदेशको स्थानीय तहमा प्रमुख र उपप्रमुख गरी १०८ सिट छ। एमालेको प्रदेश सभामा हाल २५ सिट छ भने स्थानीय तहमा ६० सिट छ।
राष्ट्रिय सभा निर्वाचनमा प्रदेश सांसदको मतभार अर्थात् एक मत बराबर ५३ र स्थानीय तहको प्रमुख÷उप्रमुखको एक मत बराबर १९ मतभार निर्धारण गरिएको छ।
यो अंकगणित अनुसार प्रदेश सांसदतर्फ कांग्रेसको ३६ र एमालेको २५ गरी ३ हजार २३३ हुन आउँछ। स्थानीय तहमा कांग्रसेको १०८ र एमालेको ५९ सिट छ।
एमालेबाट निर्वाचित भएका धुलिखेल नगरपालिकाका मेयर अशोक व्याजुले राजीनामा दिएर प्रतिनिधि सभा निर्वाचनमा होमिएका छन्।
प्रतिनिधि सभा निर्वाचनमा भाग लिन कांग्रेसबाट एक र एमालेबाट दुई सांसद र एक नगर प्रमुखले राजीनामा दिएसँगै १७८ मतभार कम भएको छ। तथापि, यसले मतभारमा ठूलो प्रभाव भने पर्ने छैन।
स्थानीय तहका प्रमुख÷उपप्रमुखको मतभार १९ छ। यो अंकगणित अनुसार स्थानीय तहतर्फ यी २ दलको ३ हजार १७३ हुन्छ।
प्रदेश र स्थानीय तह दुवै गरी कांग्रेस–एमाले गठबन्धनको मतभार ६ हजार ४०६ हुन्छ। दलीय अंक गणितकै आधारमा सत्ता गठबन्धनका साझा उम्मेदवार दंगाल र देवकोटाको आजबाट राष्ट्रिय सभा सदस्यको यात्रा सुरु हुनेछ।
यता, बागमतीमा नेकपाको कुल मतभार २ हजार ५६० छ। राष्ट्रिय सभा सदस्यको लागि उम्मेदवारी दर्ता गराएको नेमकिपाको पनि बलियो मतभार छैन। प्रदेश सभामा ३ सिट र स्थानीय तहमा २ सिट रहेको नेमकिपाको कुल मतभार १९७ मात्रै हुन आउँछ।
यो अंकगणित हेर्ने हो भने बागमती प्रदेशतर्फबाट राष्ट्रिय सभामा एमाले र कांग्रेसको एक÷एक एक सिट सुरक्षित देखिन्छ।
निर्वाचनमा प्रदेश सांसद र स्थानीय तहको प्रमुख÷उपप्रमुख गरी ३३८ मतदाताले मतदान गर्नेछन्। कुल ३४७ मतदाता रहेकोमा प्रदेश सांसद ६ र पालिका प्रमुख तीनजनाले राजीनामा दिएर प्रतिनिधि सभा निर्वाचनमा होमिएका हुन्।
राष्ट्रिय सभा सदस्य निर्वाचन कार्यक्रमअनुसार आज बिहान ९ बजेदेखि दिउँसो ३ बजेसम्म हेटौँडा–४ स्थित भुटनदेवी माध्यामिक विद्यालयमा मतदान हुनेछ।
मतदानका लागि दुईवटा मतदान केन्द्र स्थापना गरिएको छ। मतदान सकिए लगत्तै आजै मतगणना गरिने प्रदेश निर्वाचन कार्यालय, हेटौँडाले जनाएको छ।
प्रतिक्रिया