फोहोर भएको रै’छ भने हामी काठमाडौँ महानगरपालिकालाई जरिवाना तिर्छौं: राजेन्द्र लिङदेन (अन्तर्वार्ता)

प्रदर्शनको क्रममा तपाईंहरुले सडकमा फोहोरामैला गर्नु भएको त  थियो नि?
त्यस्तो केही गरेको जस्तो त लाग्दैन। तर, लाखौँ मानिस आएको ठाउँमा कसैले केही फोहोर गरेको पनि हुन सक्छ। यस विषयमा हामी बुझ्छौँ।

तपाईंहरुको अफिसमा महानगरको आधिकारिक पत्र आएपछि जरिवाना तिर्नुहुन्छ?
हामी पत्र हेर्छौं। साथीहरुबीचमा सल्लाह गर्छौं। फोहोर भएको हो कि होइन, त्यो पनि बुझ्छौँ। त्यसपछि महानगरपालिकासँग पनि सम्पर्क गर्छौं। त्यसपछि के गर्ने निर्णय गरौँला। यो विषयमा अहिले आँत्तिनुपर्ने, हतारिनु पर्ने, तिर्छौं या तिर्दैनौँ भनेर पाखुरा सुर्किनुपर्ने जरुरी छैन। 

यसअघि गत वर्ष पनि महानगरपालिकाले तपाईंहरुलाई फोहोर गरेको भनेर जरिवाना तोकेको थियो नि, त्यतिबेला पैसा तिर्नु भएन? 
यो विषय मलाई ठ्याक्कै जानकारी भएन। तर, त्यतिबेला महानगरपालिकाले जरिवानाको पत्र पठाएपछि हामी आफैँले पनि सरसफाइ गरेका थियौँ कि जस्तो लाग्छ। त्यतिबेला जरिवाना तिरेका थियौँ कि थिएनौँ हाम्रो सचिवालयलाई सोघ्नुपर्छ। हाम्रो कारणले फोहोर भएको, नगरपालिकालाई नोक्सान भएको रैछ भने त्यो रेगुलर क्रियाकलाप हो। सचिवालयले जरिवाना तिरिहाल्छ नि। 

फोहोर गर्दा, क्षति गर्दा महानगरपालिकाले जरिवाना तिराउनुलाई तपाईं ठिकै मान्नु हुन्छ नि? 
फोहोर मैला भयो, कतै केही क्षति भयो भने महानगरपालिकाले जरिवाना तिराउनु ठिकै कुरा हो। स्थानीय तहहरु अहिले स्वायत्त छन्। तर, आइतबार हाम्रो जुलुसको कारणले फोहोर भएको हो कि होइन, के भएको हो मैले बुझ्न बाँकी छ।