नेपालका ८ जना सांसद यतिबेला भारत यात्रामा छन्। प्रतिनिधिसभाको अन्तर्राष्ट्रिय सम्बन्ध तथा पर्यटन समिति ८ जना सदस्यहरू मंगलबारदेखि भारत भ्रमणमा निस्किएका हुन्।
प्रतिनिधिसभाको अन्तर्राष्ट्रिय सम्बन्ध तथा पर्यटन समितिका सभापति राजकिशोर यादवको नेतृत्वमा ती सांसदहरूले भारत भ्रमण थालेका हुन्।
उनीहरू भारतीय लोकसभाको विदेश मामिला समितिको निम्तोमा त्यहाँ पुगेका हुन्। अनुभव आदानप्रदानका लागि यो भ्रमण गरिएको समितिका सभापति यादवले मंगलबार नयाँ दिल्लीस्थित पत्रकारहरूसँग बताएका छन्।
यादवले लोकसभाले गरेको निम्तो मान्न आफूहरू भारत भ्रमणमा निस्किएको जानकारी दिएका छन्। उनले भारतीय लोकसभाको अभ्यास हेरेर तिनबाट आफूहरूले धेरै सिक्न सकिने बताएका छन्।
नेपाली सांसदहरूले बुधबार भारतीय नयाँ संसद् भवन अवलोकन गर्दैछन्। यो टोलीले लोकसभा अध्यक्ष ओम बिड्लासँग भेटवार्ता पनि गर्ने भएको छ।
नेपाली सांसदहरूले भारतीय विदेशमन्त्री एस जयशंकर र पर्यटन मन्त्री जी किसन रेड्डीसँग पनि भेटवार्ता गर्ने तालिका तय भएको छ।
मंगबार नै सांसदहरूले नयाँ दिल्लीस्थित नेपाली राजदूत शंकरप्रसाद शर्मासँग भेटघाट गरिसकेका छन्।
भारत यात्रामा रहेका नेपाली सांसदहरूमा टोली नेता राजकिशोर यादव, सांसदहरू छिरिङ शेर्पा, हरिप्रसाद उप्रेती, शिशिर खनाल, योगेश गौचन, सम्झना थपलिया, गंगाराम चौधरी र सुनिता बराल छन्।
यो टोलीमा संसदीय समितिका समितिका सहसचिव बबिता मिश्र र शाखा अधिकृत प्रमिला पौडेल गौतम पनि छन्।
नेपाली टोली नयाँ दिल्लीमा राजनीतिक संवाद सकेर पर्यटकीयस्थल गोवा पनि जाने भएको छ। त्यहाँपछि मुम्बई, लखनऊ र हिन्दु धर्मावलम्बीको तीर्थस्थल बनारस पनि यो टोली जाने बताइएको छ।
Shares
प्रतिक्रिया