‘पृथ्वीको जुनसुकै स्थानमा एक घण्टाभित्र यात्रा’

२०२४ सम्म मंगलग्रहमा मानिस पठाउने एलन मस्कको सपना



बिएफआरको नमुना चित्र
बिएफआरको नमुना चित्र
स्पेस एक्स

अन्तरीक्ष यान निर्माता स्पेस एक्सका प्रमुख एलन मस्क प्रविधिको क्षेत्रमा भविष्यद्रष्टा मानिन्छन्। उनी वैज्ञानिक आविष्कारको दुनियाँमा नयाँनयाँ अवधारणा सार्वजनिक गरिरहन्छन्। उनको यस्ता योजना व्यापारिक उद्देश्यसँग पनि जोडिएको हुन्छ।

भर्खरै आर्टिफिसियल इन्टेलिजेन्सका कारण प्रलय निम्तिने भविष्यवाणी गरेका मस्कले पृथ्वीको जुनसुकै स्थानमा एक घण्टाभित्र पुग्न सकिने र सन् २०२४ सम्म मंगल ग्रहमा मानिस पुग्ने बताएका छन्।

अष्ट्रेलियाको एडिलेडमा जारी इन्टरनेसनल एस्ट्रोनटिकल कंग्रेस (आइएसी) मा बोल्दै मस्कले यस्तो बताएका हुन्। स्पेस एक्सले युट्युबमा सार्वजनिक गरेको भिडियोमा लण्डनदेखि न्युयोर्कसम्मको यात्रा २९ मिनेटमा हुने बताइएको छ।

उनले कंग्रेसमा दर्शकहरुमाझ मंगलग्रह पठाउने यानको निर्माण अर्को वर्षदेखि सुरु गर्ने पनि बताए।

मस्कले स्पेस एक्सले बिएफआर नामक यानको निर्माणमा ध्यान दिने बताए। स्पेस एक्सले बिएफआर अर्थात् 'बिग फाल्कन रकेट' निर्माण गर्ने योजना बनाइरहेको उनले बताए। कम्पनीभित्र यसलाई ‘बिग फकिङ रकेट’ पनि भन्ने गरिएको खुलासा उनले गरे। बिएफआरले स्पेसएक्सले अहिले गरिरहेका सम्पूर्ण काम गर्ने र अर्को ग्रहसम्मको यात्रा पनि तय गर्ने उनको दाबी छ।

मस्कले पहिलो पटक अघिल्लो वर्षको आइएसीमा मंगलग्रहमा यान पठाउने महत्वकांक्षी योजना सार्वजनिक गरेका थिए। यसपटक उनले यसबारे केही हदसम्म विस्तृत विवरण सार्वजनिक गरेका छन्।

उनले भनेको बिएफआर मात्र १०६ मिटर उचाइ तथा ९ मिटर चौडाइको यान हुनेछ। उनले सम्पूर्ण कम्पनीको शक्ति यही एक प्रणालीमा लगाउने बताएका छन्। बिएफआरले अहिलेका अन्तरीक्ष यानभन्दा धेरै स्याटेलाइट प्रक्षेपण गर्न सक्नेछ।

यसको अर्थ बिएफआरले स्याटेलाइट प्रक्षेपण गर्ने, स्पेस स्टेसनको मर्मत गर्ने कामबाहेक चन्द्रमा र मंगल ग्रहमा समेत मानिसलाई पठाउने छ। त्यस्तै पृथ्वीभित्रै पनि निश्चत ठाउँबाट अर्को निश्चित ठाउँसम्म मानिसलाई पनि पुर्‍याउने उनले बताएका छन्।

पृथ्वीभित्र यस्तो यानले २७ हजार किलोमिटर प्रतिघण्टाको दरले यात्रा गर्नेछ। यद्यपि मंगल अभियानको जस्तो विस्तृत विवरण पृथ्वीभित्रको यात्राबारे उनले दिएनन्।

स्पेस एक्सका सिइओ, चिफ डिजाइनर हुनुका साथै उनी टेस्ला इलेक्ट्रिक कारका संस्थापक तथा नवीकरणीय उर्जाको क्षेत्रमा काम गरिरहेको सोलारसिटी अध्यक्ष पनि हुन्।

उनको नेतृत्वमा स्पेस एक्सका १६ ओटा अन्तरीक्ष यान सफलतापूर्वक पृथ्वीमा अवतरण गरिसकेका छन्। त्यसमध्ये दुई ओटा त दोस्रो पटक फेरि प्रक्षेपण गरिएका छन्।

टेस्ला तथा स्पेस एक्स सिइओ एलन मस्क

टेस्ला तथा स्पेस एक्स सिइओ एलन मस्क

उनी अन्तरीक्ष यानको पुनःप्रयोगमा जोड दिने गर्छन्। यस्ता यान एक पटक मात्र प्रयोग गर्न सकिने हुनाले अन्तरीक्ष गतिविधि यति महंगो भएको उनको भनाइ छ। कुनै समय अन्य हवाइजहाजजस्तै यसलाई पनि पुनःप्रयोग गर्न सकिने उनको दाबी छ।

स्पेस एक्सको फाल्कन ९ यानलाई आंशिक रुपमा पुनःप्रयोग गर्न सकिन्छ। तर उनको योजनामा रहेको बिएफआर भने पूर्णतयाः पुनःप्रयोग गर्न सकिने हुनेछ।

आफ्ना महत्वकांक्षी योजनाहरु तोकिएको समयभित्रै पूरा नहुने पनि मस्क स्वीकार्छन्। उनले बिएफआरको मानवविहीन पहिलो संस्करण २०२२ सम्ममा मंगलग्रह पुग्ने बताए।

उनको महत्वकांक्षी योजना सुनेर आइएसीका ४ हजार दर्शकले ताली पिटे। तर ग्राहकहरुले आफूलाई सजिलै विश्वास नगर्ने कुराप्रति मस्क सचेत छन्। उनले आफ्ना ग्राहक परम्परावादी भएको र बिएफआरको अवधारणालाई पत्याउनुअघि ‘सेकेण्ड ह्याण्ड’ फाल्कन अन्तरीक्ष यानलाई बारम्बार पुनःप्रयोग गरेर देखाउनुपर्ने बताए।

‘स्पेस एक्सका एलन मस्क यस्तै छन्, उनी यस्तै गर्छन्,’ मेलबर्नस्थित स्विनबर्न विश्वविद्यालयका प्राध्यापक आलन डफीको भनाइ बिबिसीले उधृत गरेको छ, ‘उनीहरुसँग ठूलो भिजन छ र उनीहरु त्यसतर्फ काम गर्छन्। तर उनीहरु जहिल्यै दिमागमा नाफा राखेर मात्रै कदम चाल्छन्। यदि त्यहाँ उनीहरुले नाफा देखे भने ग्यारेन्टी दिन सकिन्छ, त्यो व्यवसाय सफल भयो।’ एजेन्सी

प्रकाशित १३ असोज २०७४, शुक्रबार | 2017-09-29 19:54:52

प्रतिकृया दिनुहोस

Loading...
Loading...

विचार

सुखद शुक्रबार

ब्लग

रोचक

NepalKhabar Tweets

विशेष

  • बेइजिङमा खुल्यो नेपाली भाषा विशेषज्ञ समिति

    चीनको संस्कृति मन्त्रालयको वैदेशिक संस्कृति सम्पर्क व्यूरो तथा बेइजिङ भाषा तथा संस्कृति विश्वविद्यालयको संयुक्त प्रयासमा सोमबार नेपाली भाषा...

  • बाबुराम भट्टराईका मामा चन्द्रप्रसाद न्यौपाने

    बाबुरामका मामा भन्छन्ः भाञ्जाको जीत हर्ष न बिस्मात!

    ‘हिजो म नराम्ररी झुक्किएछु। प्रकाश (कांग्रेसबाट गोरखा २ (ख) प्रदेशमा विजयी) ले बुवा हिँड्न सक्नुहुन्न गाडीमा चढ्नुस् भन्नुभयो, म चढेँ। कुनबेला...

  • जीतपछि प्रचण्ड हर्षित, परिवार भावुक (तस्वीर)

    जन्मदिनको अघिल्लो दिन चितवन–३ मा विजयी भएपछि माओवादी केन्द्रका अध्यक्ष पुष्पकमल दाहाल ‘प्रचण्ड’ निकै हर्षित देखिएका छन्। तर, उनका परिवारका सदस्यहरु...

  • यू-१६ नेपाली टोली

    नारायण जोशीको उत्कृष्ट बलिङमा नेपालको सहज जित

    एसीसी यू–१६ इस्टर्न रिजन क्रिकेट प्रतियोगिता अन्तर्गतको सोमबार भएको पहिलो खेलमा नेपालले आयोजक थाइल्याण्डलाई १३३ रनले पराजित गरेको छ।