हङकङ विमानस्थलबाट १ करोड २० लाख डलर बराबरको लागूऔषधसहित महिला पक्राउ

क्यानडाबाट उडान भरेर हङकङ अन्तर्राष्ट्रिय विमानस्थलमा उत्रिएका २८ वर्षीया एक महिला ठूलो परिमाणको लागूऔषधसहित पक्राउ परेकी छन्।

क्यानडाको भ्यानकुभरबाट आएकी ती महिलाको सुटकेस खानतलासी गर्दा १३ किलो ‘आइस’ र १६ किलो गाँजा फेला परेको लागूऔषध ब्युरोका इन्स्पेक्टर एनजी का वाईलाई उद्धृत गर्दै साउथ चाइना मर्निङ पोस्टले जनाएको छ।

बरामद सामानको अनुमानित सडक मूल्य १ करोड २० लाख हङकङ डलर (१.५ मिलियन अमेरिकी डलर) भएको प्रहरीले जनाएको छ।

इन्स्पेक्टर एनजीले आइतबार जानकारी गराएअनुसार, पक्राउ परेकी २८ वर्षीया महिला अहिले प्रहरीको हिरासतमा छन्। उनलाई सोमबार वेस्ट काउलुन अदालतमा उपस्थित गराइनेछ।

ती महिलालाई लागूऔषध तस्करको गिरोहले प्रयोग गरेको अनुमान प्रहरीको छ। प्रहरी बलले लागूपदार्थ ओसारपसार विरुद्ध आफ्नो शून्य सहनशीलता दोहोर्‍याउँदै यस्ता गतिविधिमा संलग्न जोकोहीले गम्भीर परिणाम भोग्नुपर्ने चेतावनी दिएको छ।