हङकङमा आइतबार राति लुटपाट गर्ने समूहका एक जना पक्राउ

हङकङमा आइतबार राति लुटपाट मच्चाउने समूहका एक जनालाई प्रहरीले पक्राउ गरेको छ।

आइतबार राति १० बजे जोर्डन रोड र फेरी स्ट्रिटको जक्सनमा १० जनाभन्दा बढीको एक समूहले लुटपाट मच्चाएका थिए।

उनीहरूले दुई जना व्यक्तिलाई मुक्का र धातुको पाइपद्वारा आक्रमण गरी हङकङ डलर २५ हजार लुटेर भागेका थिए।

दुई वटा सेडानमा आएका उनीहरू आक्रमण पश्चात् याउमा तेइ र चिमसा चोइतर्फ भागेका थिए।

भाग्ने क्रममा एउटा सेडानले आफ्नो नियन्त्रण गुमाउन पुग्दा सुस्त गतिमा गुडिरहेको कारलाई ठक्कर दिएको थियो।

लुटेराहरूको आक्रमणबाट घाइते दुई जनालाई वोङवाह अस्पताल र प्रिन्सेस मार्गरेट अस्पताल लगिएको थियो। उनीहरूलाई टाउको र ढाडमा चोट लागेको छ।

घाइतेमध्येकी महिलाले ढाडमा निकै दुखेको गुनासो गरेकी थिइन्।

प्रहरीले लुटेरा समूहका अन्य सदस्यको खोजी कार्य जारी राखेको जनाएको छ।