नेपालमा कोरोना महामारी दिनप्रतिदिन बढ्दै गएपछि यसको नियन्त्रणमा सहयोग गर्ने विषयमा छलफल गर्न गैरआवासीय नेपाली संघ (एनआरएनए) ले आकस्मिक बैठक बोलाएको छ।
महामारीका बेला संघका तर्फबाट भइरहेका सहयोग र सहकार्यलाई थप प्रभावकारी बनाउने विषयमा छलफल गर्न बैठक राख्न लागिएको संघका महासचिव डा. हेम राज शर्माले जानकारी दिए।
उनका अनुसार बैठकमा विश्वभर छरिएर रहेका नेपाली मेडिकल डाक्टर, नर्स र नेपालको स्वास्थ्य प्राधिकरणसँग एनआरएनएको स्वास्थ्य समितिले समन्वय गरी कोरोना नियन्त्रणविरुद्ध कार्ययोजना प्रस्ताव तयार पार्ने विषयमा छलफल गरिनेछ।
नेपाली समयअनुसार शनिबार साँझ ६ बजे जुममार्फत हुने बैठकमा राष्ट्रिय समिति परिषद्का अध्यक्ष तथा महासचिव, अन्तर्राष्ट्रिय समन्वय परिषदका पदाधिकारी, सदस्य र मनार्थ परिषद सदस्यलाई आमन्त्रण गरिएको छ।
हालसम्म एनआरएनए जापानका तर्फबाट कोभिडपीडित राहत कोषमा ५ लाख रुपैयाँ प्रदान गर्ने प्रतिबद्धता आएको संघले जनाएको छ।
एनसीसी बहराइनबाट ६ लाख तथा एनसीसी जर्मनीबाट १ लाख रुपैयाँ संघको खातामा जम्मा भइसकेको छ।
एनआरएनए अमेरिका र अस्ट्रेलियाले सहयोग जुटाउन छलफल सुरु गरेका छन्।
प्रतिक्रिया