ट्रम्पले भारतविरुद्ध घोषणा गरे २५ प्रतिशत भन्सार महसुल र जरिवाना

अमेरिकी राष्ट्रपति डोनाल्ड ट्रम्पले भारतविरुद्ध २५ प्रतिशत भन्सार महसुल घोषणा गरेका छन्। सो महसुल अगस्ट १ देखि लागू हुने उनको भनाइ छ।

‘याद छ, भारत हाम्रो मित्र हुँदाहुँदै वर्षौंदेखि हामीले उसँग तुलनात्मक रुपमा निकै कम व्यापार गरेका छौँ। किनकि उनीहरूको महसुल एकदम्म उच्च छ। विश्वकै धेरैमध्ये,’ ट्रम्पले भारतप्रति असन्तुष्टि जनाउँदै सामाजिक सञ्जालमा लेखेका छन्।

‘भारतले २५ प्रतिशत महसुल तिर्नेछ,’ उनको भनाइ छ। 

त्यस्तै रुससँग हतियार र इन्धन किनेकोमा पनि ट्रम्पले चर्को असन्तुष्टि जनाएका छन्। यसका लागि पनि थप जरिवाना गर्ने उनको घोषणा छ।

भारतले अमेरिकासँग व्यापार सम्झौताको प्रयास गर्दै आएको थियो। तर, ट्रम्पसँगको सम्बन्धमा असहजता देखेर पछिल्लो समय नयाँ दिल्लीले चीनसँग सम्बन्ध सुधारलाई तीव्रता दिएको छ। 

रुस, भारत र चीनको त्रिपक्षीय सहकार्य ब्युँताउने चर्चा पनि चल्न थालेको छ।