ताइवानको १३ तले भवनमा आगो लाग्दा ४६ को मृत्यु, ७९ जना घाइते

ताइवानको काऊसुङ्ग शहरमा बिहीवार १३ तले भवनमा भीषण आगलागी हुँदा ४६ जनाको ज्यान गएको छ।

आगलागीमा परेर अन्य ७९ जना घाइते भएका छन्। जसमा १४ को अवस्था गम्भीर रहेको छ। दमकल विभागका अनुसार घाइतेहरूलाई अस्पताल भर्ना गरिएको छ।

दमकल विभागका अनुसार आगो भीषण थियो। यस भवनका अधिकांश तला जलेर खरानी भएका छन्।

अधिकारीका अनुसार आगो बिहानै करिब ३ बजे लागेको हो। आगो लागेको कारण खुलेको छैन। घटनास्थलमा रहेका मानिसहरुले बिहानै ३ बजे विस्फोटको आवाज सुनेको बताएका छन्।

अधिकारीहरुले सातौँ र एघारौँ तलामा मानिसहरु फसेको अनुमान गरेका थिए। तर अहिले त्यो भवन पूरै खाली गरिएको छ।