बंगलादेशबाट कामदार लैजान मलेसियाले नयाँ प्रणाली सुरु गर्ने

मलेसियाले पुनः नयाँ प्रणालीबाट बंगलादेशी कामदार लैजाने भएको छ। बंगलादेशी मिडियाका अनुसार बंगलादेशका प्रवासी कल्याणमन्त्री इमरान अहमदले बंगलादेशी कामदारका लागि मलोसियाली श्रमबजार पुनः खुल्ला भएको जानकारी दिएका हुन् ।

श्रमबजार खुल्ला गरिएसँगै रोजगारदाताले मलेसियामा रहेको एजेन्सीहरुका माध्यमबाट बंगलादेशी कामदार लैजान सक्ने उनले बताए। द डेलिस्टार अनलाइनका अनुसार यसअघिको सिधै बंगलादेशमा रहेका एजेन्सीहरुबाट कामदार लैजाने प्रणाली पनि कायमै रहेको उनको भनाइ छ।

दक्षिणपूर्वी एसियाली देशको भर्खरै भ्रमणका क्रममा यस्तो सहमति भएको उनले जानकारी दिए । नयाँ प्रणाली कार्यान्वयनमा आएसँगै रोजगारदाताले मलेसियामा रहेको एजेन्सीमा आवश्यक कामदार माग गर्नुपर्नेछ । त्यसपछि उक्त संस्थाले नै बंगलादेशी मेनपावरसँग सम्पर्क गरी कामदार मलेसिया पठाउनेछन् । तर सीमित बंगलादेशी एजेन्सीले मात्रै कामदारको माग लिन सक्नेछन् । पछिल्लो प्रणाली दुई देशबीचको मौजुदा सहमतिमै थप गरिएको मन्त्रालयका सचिव सलिम रेजाले बताए ।

उक्त सहमतिले यही नोभेम्बर २४ र २५ मा ढाकामा हुने संयुक्त कार्यदलको बैठकमा अन्तिम रुप पाउनेछ । यसबाहेक यसअघि सहमति हुन नपाएका थुप्रै विषयमा समेत दुई देशले एमओयू गरेको बताइएको छ।