काठमाडौंमा राज बब्बरले दिएको अटोग्राफ, हङकङमा जयाप्रदासँगको जम्काभेट

काठमाडौंमा राज बब्बरले दिएको अटोग्राफ, हङकङमा जयाप्रदासँगको जम्काभेट

कमल पौड्याल
हङकङ, माघ १५

हङकङमा कोरोना भाइरसको संक्रमण फेरि उकालो लागेपछि गत डिसेम्बर ११ तारिखदेखि सरकारले सबै रेस्टुरेन्ट/बार बेलुकी अनिवार्य बन्द गर्न आदेश दिएको छ। जसले गर्दा म तेस्रोपटक पुनः बेलुकाको समय फुर्सदिलो भएको छु।

आफ्नो देशका समाचार हेर्ने जाँगर पटक्कै छैन। ‘समृद्ध नेपाल, सुखी नेपाली’ हेर्न त हाम्रो पुस्ताले अर्को जुनीमा मात्र पाउला ! मुलुकमा यतिबेला कोरोना महामारीलाई माथ गर्दै राजनीतिक आरोप/प्रत्यारोपले अहिलेसम्मकै उच्चतम् बिन्दु छोएको छ।

नमस्कार गर्दै जोडिने हात र कमरेड अभिवादन भन्दै उचालिने मुठ्ठी एकाएक भूमिगत भएका छन्। सट्टामा एकअर्कालाई आरोप लगाउँदै, कुरीकुरी, छिःछिः र दूरदूर गर्ने चोर औंलो सक्रिय भएका छन्, अहिले। दुवै पक्षका नेता भनाउँदाहरूलाई कानमा समातेर तपाईंका यी यी गल्ती छन्, सुधार्ने कि नसुधार्ने भनेर चेतावनी दिने हुती कुनै कार्यकर्तामा देखिएको छैन। बरु आआफ्ना समूहको समर्थनमा शक्ति प्रदर्शन गर्न, ताली बजाउन र जुहारी खेल्न प्रतिस्पर्धा गरिरहेका छन्। कुन्साङ काकाको भाषामा भन्ने हाे भने अर्काथरीचाहिँ  ‘कुनचाहिँ साँढेको जाइफल’ पहिला झर्ला र खाउँला भनेर जोखना हेरिरहेका छन्।

यो पार्टी वा फलानो नेताले चाहिँ देश सम्हाल्छ भन्ने व्यक्ति यतिबेला कोही भेटिँदैन। खैर, यो गुनासो/असन्तोषलाई यहीँ बिट माराैँ र लागौं विषयवस्तुतर्फ।

हिजोआज बेलुका पुराना, सुमधुर, कर्णप्रिय लोकधुन बजाउने वाद्यवादक टोली, साजसज्जा र फरक चरित्रका पात्रसहित दोस्रो सिजनको ‘जितु कमेडी’, ‘द कपिल शर्मा सो’, अमिताभ बच्चनको ‘कौन बनेगा करोडपति’, राजेश हमालको ‘को बन्छ करोडपति’का छुटेका शृंखला, नहेरेका हिन्दी/नेपाली चलचित्र तथा पुस्तक मेरा साथी बनेका छन्। चलचित्रमा अभिनयको पाटोबाहेक ‘को बन्छ करोडपति’ मा प्रस्तुति शैली र व्यक्तित्वका हिसाबले राजेश हमाल अमिताभ बच्चनकै समानान्तर लाग्छन्, मलाई।

हालसालैको ‘द कपिल शर्मा सो’मा राज बब्बर र जयाप्रदाको जोडी पहिलोपटक देखापर्‍याे। चलचित्र क्षेत्रबाट करिब-करिब सेवानिवृत्त भइसकेका यी दुई कलाकार अहिले अलग–अलग दुई भारतीय पार्टीमा आबद्ध भई सक्रिय राजनीतिक जीवन बिताइरहेका छन्। राज बब्बर र जयाप्रदा दुवैलाई मैले फरक–फरक कालखण्डमा प्रत्यक्ष भेटेको छु। दुई दसकपछि यौटै चलचित्रमा सँगै देखिन लागेका उनीहरूका चलचित्र र राजनीतिक यात्राबारे कपिल शर्माले बडो रमाइलो तरिकाले त्यो शृंखला बिट मारे। म भने आफ्नो विगतमा निकैबेर हराएँ, हङकङको आकाशमुनि।

राज बब्बरले हस्ताक्षर गरेको त्यो १० रुपैयाँको नोट 
काठमाडौं उपत्यकामा न्युरोडको रञ्जना, दरबारमार्ग नजिकैको विश्वज्योति, पाटनको अशोक, राजदरबार दक्षिणपट्टिको जयनेपाल र भक्तपुरमा यौटा गरी जम्माजम्मी पाँचवटा सिनेमा हल थिए होलान्। जतिबेला नेपाली सिनेमा वर्षमा यौटा/दुइटा मात्र बन्थे। बाह्रै मास हिन्दी सिनेमाकै आधिपत्य रहन्थ्यो।

अझ तराई मूलवासीले यौटा हार्मोनियमजस्तो बाकसमा ‘ये हेमा मालिनी देखो’, ‘अमिताभ बच्चन देखो’, ‘सेरावान देखो’, ‘जिनित अमान देखो’, ‘हावडाका पुल देखो’ भन्दै प्रचार गर्थे। अनि एक सुका (९२५ पैसा) तिरेर दूरबिनजस्तो सिसाबाट पालैपालो हेरिन्थ्यो। सिनेमा हेर्न टिकट लाइनमा बस्यो, अक्सर काउन्टरनिर पुग्दा टिकट सकियो भन्दै झ्याल बन्द हुन्थ्यो। प्रहरी र सिनेमा हल प्रसाशन नदेखेझैं गर्थे। अनि ब्ल्याकमा किनेर हेर्न परेपछि महिनाभरिको बजेट चौपट !

माघ १५, २०७७, बिहीबार

प्रतिक्रिया

Danfe Global Hong Kong Pvt. Ltd.

FT 3 G/F Bo Lun Building, 28-34 Battery Street,
Yau Ma Tei, Kowloon Hong Kong

[email protected]
[email protected]

Hong Kong Team

Correspondent
Purna Gurung (Macau)

Radio Correspondent
Santosh Tamang
HK News Coordinator
Magendra Rai

Editor
Binu Subedi

Editor in Chief
Purna Basnet
Copyright © 2021 Nepalkhabar. All Rights Reserved. Designed by Curves n' Colors. Powered by .