युनिकोड
अर्को महिना हुने आईसीसी टी२० विश्वकपको तयारीमा रहेको नेपालले घरेलु मैदानमा वेस्ट इन्डिज ‘ए’सँग पाँच खेलको टी२० शृंखला खेलिरहेको छ।
शृंखलाको चार सकिँदा नेपालले एक खेलमा मात्र जित निकालेको छ। पहिलो खेलमा ४ विकेटको जित निकालेको नेपालले त्यसपछिका तीन खेलमा लगातार हार व्यहोर्दै शृंखला गुमाइसकेको छ।
शृंखलाका अहिलेसम्मका चार खेललाई हेर्ने हो भने कप्तान रोहित पौडेलले कप्तानी पारी खेलिरहेका छन्। नेपालका अन्य ब्याटरले लामो इनिङ्स खेल्न नसक्दा पनि रोहितले कप्तानी भूमिका निर्वाह गरिरहेका छन्।
ओमानमा भएको प्रिमियर कपको सेमिफाइनल र तेस्रो स्थानको खेलमा पराजित भएपछि नेपाली क्रिकेट समर्थकले कप्तान रोहित र टोलीको आलोचना सुरु गरिसकेका थिए। तर घरेलु मैदानमा बलियो टोली वेस्ट इन्डिजलाई बोलाएर अभ्यास गरिरहँदा कप्तान रोहितले ब्याटबाट नै आलोचना गर्नेलाई जवाफ फर्काइरहेका छन्।
र यसलाई शुभसंकेतका रुपमा पनि लिइएको छ। ३ खेल हारका बाबजुद रोहितले बलियो कन्फिडेन्स देखाउनु विश्वकपको संघारमा नेपाली टोलीका लागि खुसीको कुरा हो।
उनी भन्छन्, ‘प्रिमियर कपमा दुई खराब इनिङस्पछि डिसिजन मेकिङ बढिरहेको छ। पहिलो इनिङ्सपछि कन्फिडेन्ट पनि आइरहेको छ। त्यही विश्वासमा खेलिरहेको छु।’
शृंखलाको पहिलो खेलमा वेस्ट इन्डिजलाई ४ विकेटले पराजित गर्दा कप्तान रोहितले १ सय १२ रनको उत्कृष्ट पारी खेलेका थिए। सो खेलमा उनले ५४ बलमा १० चौका र ६ छक्का प्रहार गरेका थिए।
शृंखलाको दोस्रो खेलमा १० रनले पराजित हुँदा पनि उनले ७१ रनको अविजित पारी खेले। तेस्रो खेलमा भने कप्तान रोहितलाई विश्राम दिइएको थियो। रोहितलाई विश्राम दिइएको खेलमा दीपेन्द्र सिंह ऐरीले टोलीको कमानी सम्हालेका थिए।
चौथो खेल २८ रनले गुमाउँदा पनि रोहितले ८२ रनको उत्कृष्ट खेल प्रदर्शन गरे।
विश्वकपअघि लयमा देखिएका कप्तान रोहित आफैँले पनि जारी शृंखलामा राम्रो खेलिरहेको अनुभव गरिरहेका छन्।
‘यो प्रतियोगितामा मैले राम्रो खेलिरहेको छु। मेरो ब्याटले रन लगाइरहेको छ। गुड डेलाई ग्रेटमा परिणत गर्नुपर्ने सोचिरहेको छु’, रोहित भन्छन्।
‘ब्याटरले धैर्य देखाउनुपर्छ’
कप्तान रोहितले अन्य खेलाडी लामो समय क्रिजमा टिक्न नसक्नुलाई उनीहरुको ‘डिसिजन मेकिङ’मा केही गल्ती भइरहेको महसुस गरेका छन्। जसका लागि अन्य खेलमा त्यसमा काम गर्नुपर्ने जरुरी उनले देखेका छन्। ब्याटरले अलिकति धैर्य देखायो भने नतिजा आउने उनी सुनाउँछन्।
टोलीमा शीर्ष चारका ब्याटरमध्ये १ जनाले पनि राम्रो गर्यो भने नतिजा आफूहरुको पक्षमा आउने विश्वासमा उनी छन्।
‘शीर्ष क्रमका ब्याटर छिटै आउट हुँदा मिडल ओभरमा अलि प्रेसर (दबाब) आइरहेको छ त्यसमा इम्प्रुभ (सुधार) भयो भने राम्रो हुन्छ’, उनी थप्छन्।
यो शृंखलापछि नेपाली टोली अभ्यासका लागि वेस्ट इन्डिज जानेछ। टी२० विश्वकपमा नेपालले अमेरिका र वेस्ट इन्डिजमा समान २ खेल खेल्नेछ। वेस्ट इन्डिजमा नेपालले अभ्याससँगै केही अभ्यास खेल समेत खेल्ने सम्भावना छ।
नेपालले सन् २०१४ पछि विश्वकप खेल्दै छ। विश्वकपका लागि बुधबार राष्ट्रिय टोलीको घोषणा समेत भैसकेको छ। यो टोलीमा सोमपाल कामी बाहेक सबै खेलाडीका लागि पहिलो विश्वकप अनुभव हुनेछ।
सन् २०१४ मा नेपालले पहिलो पटक विश्वकप खेल्दा सोमपाल टोलीमा थिए।
सोमपाल बाहेक अहिलेको टोलीमा सबै नयाँ खेलाडी छन्। विश्वकप खेल्ने टोलीलाई कप्तान रोहित अहिलेको उत्कृष्ट १५ रहेको बताउँछन्।
‘अहिलेको अवस्थामा यो टोली विश्वकपमा नेपालको उत्कृष्ट १५ हो जस्तो लाग्छ’, रोहित भन्छन्।
प्रतिक्रिया